تیزا ہوائیں چلنے کی بھی پیش گوئی‘اسکولوں میں ممکنہ ۱۰ روزہ گرمائی تعطیلات ۶ جولائی سے شروع ہونے کا امکان
ندائے مشرق خبر
سرینگر؍۳۰ جون
وادی کشمیر میں جاری شدید گرمی کی لہر کے دوران منگل کو سری نگر میں موسم کا دوسرا گرم ترین دن ریکارڈ کیا گیا، جہاں زیادہ سے زیادہ درجۂ حرارت۳۵ء۲ ڈگری سینٹی گریڈ تک پہنچ گیا۔
محکمہ موسمیات نے آئندہ چند روز کے دوران موسم میں نمایاں تبدیلی کی پیش گوئی کرتے ہوئے جموں و کشمیر کے مختلف علاقوں میں بارش، گرج چمک اور تیز ہواؤں کا امکان ظاہر کیا ہے۔
اس دوران اس بات کا امکان ظاہر کیا جارہا ہے کہ وادی کے تعلیمی اداروں میں ۶ جولائی سے دس روزہ گرمائی تعطیلات ہوں گی ۔
محکمہ موسمیات کے سری نگر مرکز کے ایک عہدیدار نے بتایا کہ آئندہ چند گھنٹوں کے دوران پونچھ، راجوری، شوپیاں، بڈگام اور کولگام کے متعدد علاقوں میں بارش اور گرج چمک کے ساتھ بادل برسنے کا امکان ہے۔ اس کے علاوہ ریاسی، بنیہال، رام بن، گلمرگ، اُوڑی اور سونہ مرگ کے چند مقامات پر بھی بارش متوقع ہے۔
محکمہ موسمیات نے پیش گوئی کی ہے کہ یکم سے۵ جولائی کے دوران جموں و کشمیر کے بیشتر علاقوں میں ہلکی سے درمیانی درجے کی بارش اور گرج چمک کے ایک یا دو سلسلے متوقع ہیں، جبکہ۲ سے۴ جولائی کے درمیان بعض مقامات پر موسلا دھار بارش، شدید بارش کے مختصر سلسلے، گرج چمک اور تیز ہوائیں چل سکتی ہیں۔
محکمہ کے مطابق۶سے۸ جولائی کے دوران مجموعی طور پر موسم گرم اور مرطوب رہے گا، تاہم مختلف مقامات پر ہلکی سے درمیانی بارش اور گرج چمک کا امکان بھی برقرار رہے گا۔
محکمہ موسمیات نے خبردار کیا ہے کہ۳۰ جون تک گرمی کی لہر یا گرمی جیسی صورتحال برقرار رہے گی، جبکہ۲ سے۴ جولائی کے دوران متوقع شدید بارشوں کے باعث جموں ڈویژن اور جنوبی کشمیر کے ملحقہ علاقوں کے حساس مقامات پر اچانک سیلاب، لینڈ سلائیڈنگ اور مٹی کے تودے گرنے کا خطرہ پیدا ہو سکتا ہے۔
اس کے علاوہ۲؍اور۳ جولائی کو نشیبی علاقوں میں عارضی طور پر پانی جمع ہونے کا بھی امکان ظاہر کیا گیا ہے۔
محکمہ نے عوام کو مشورہ دیا ہے کہ وہ بارشوں کے دوران ندی نالوں، آبی گزرگاہوں اور لینڈ سلائیڈنگ کے خطرے والے علاقوں سے دور رہیں، گرج چمک کے دوران غیر ضروری طور پر گھروں سے باہر نکلنے سے گریز کریں اور آسمانی بجلی اور تیز ہواؤں سے بچاؤ کے لیے احتیاطی تدابیر اختیار کریں۔
دریں اثنا محکمہ اسکولی تعلیم کی جانب سے کشمیر ڈویژن کے تمام سرکاری اور نجی اسکولوں میں۶ جولائی سے گرمیوں کی تعطیلات کا اعلان کیے جانے کا امکان ہے۔
ایک سرکاری عہدیدار کے مطابق، ڈائریکٹوریٹ آف اسکول ایجوکیشن کشمیر (ڈی ایس ای کے) نے کشمیر ڈویژن کے تمام سرکاری و نجی اسکولوں کیلئے ۱۰روزہ گرمیوں کی تعطیلات کی تجویز محکمہ اسکولی تعلیم کو ارسال کی ہے۔
عہدیدار نے ایک مقامی خبر رساں ایجنسی کو بتایا’’ڈائریکٹوریٹ نے پیر (۶جولائی) سے تمام سرکاری اور نجی اسکولوں کیلئے۱۰روزہ گرمیوں کی تعطیلات کی سفارش کی ہے، تاہم اس سلسلے میں محکمہ اسکولی تعلیم کا حتمی فیصلہ جلد متوقع ہے‘‘۔
عہدیدار نے مزید بتایا کہ یکم جولائی کو وزیر تعلیم سکینہ ایتو اور محکمہ اسکولی تعلیم کے اعلیٰ حکام ایک اہم اجلاس کی صدارت کریں گے، جس میں گرمیوں کی تعطیلات کے بارے میں حتمی فیصلہ کیے جانے کا امکان ہے۔
اس سے پہلے جموں کشمیر حکومت کی جانب سے یکم جولائی سے وادی کشمیر کے اسکولوں میں گرمیوں کی تعطیلات کے اعلان سے متعلق سوشل میڈیا پر گردش کرنے والی خبروں کو منگل کے روز حکام نے مکمل طور پر بے بنیاد قرار دیتے ہوئے واضح کیا کہ اس حوالے سے ابھی تک کوئی فیصلہ نہیں لیا گیا ہے۔
سینئر سرکاری حکام نے ایک خبر رساں ایجنسی کو بتایا کہ مختلف سوشل میڈیا پلیٹ فارمز پر یکم جولائی سے گرمیوں کی تعطیلات کے اعلان کی جو خبریں پھیلائی جا رہی ہیں، ان کی کوئی حقیقت نہیں ہے اور عوام کو ان پر توجہ نہیں دینی چاہیے۔
کمشنر سیکریٹری، محکمہ اسکولی و اعلیٰ تعلیم، رام نیواس شرما نے بھی جے کے این ایس سے بات کرتے ہوئے تصدیق کی کہ گرمیوں کی تعطیلات شروع کرنے کے بارے میں ابھی تک کوئی فیصلہ نہیں کیا گیا ہے۔
دریں اثنا، محکمہ تعلیم کے ایک سینئر افسر نے خبر رساں ایجنسی کو بتایا کہ محکمہ موسمیات نے یکم جولائی سے بارشوں اور مرطوب موسم کی پیش گوئی کی ہے، اس لیے فی الحال گرمیوں کی تعطیلات کا اعلان کرنے کی ضرورت محسوس نہیں کی جا رہی ہے۔ تاہم، محکمہ نے عارضی طور پر جولائی کے دوسرے ہفتے میں تعطیلات دینے کی تجویز پر غور کیا ہے، البتہ اس کی حتمی تاریخ ابھی طے نہیں کی گئی ہے۔
سینئر نے کہا’’طلبہ کی تعلیم کا ہر دن انتہائی اہمیت کا حامل ہے اور ہمیں اس بات کو مدنظر رکھنا چاہیے۔ آئندہ دنوں میں متوقع بارشوں اور موسم میں تبدیلی کے پیش نظر اس مرحلے پر تعطیلات کا اعلان ضروری نہیں سمجھا جا رہا‘‘۔
حکام کے مطابق محکمہ جولائی کے دوسرے ہفتے میں گرمیوں کی تعطیلات دینے کی منصوبہ بندی کر رہا ہے، تاہم اس بارے میں حتمی فیصلہ موسم کی صورتحال کا جائزہ لینے کے بعد ہی کیا جائے گا۔
قابل ذکر ہے کہ گزشتہ چند روز سے جموں و کشمیر، خصوصاً وادی کشمیر، شدید گرمی کی لہر کی زد میں ہے اور بیشتر علاقوں میں درجہ حرارت معمول سے کافی زیادہ ریکارڈ کیا جا رہا ہے۔
تاہم محکمہ موسمیات نے یکم جولائی سے بارشوں اور مرطوب موسم کی پیش گوئی کی ہے، جس سے توقع ہے کہ جاری گرمی کی شدت میں نمایاں کمی آئے گی اور عوام کو راحت ملے گی۔
۔۔۔۔
