ایجنسیاں
کولگام؍۲۲جون
ٓئندہ شری امرناتھ جی یاترا کے پیش نظر سیکورٹی انتظامات کو مزید مضبوط بنانے کے لیے کولگام پولیس نے اتوار کے روز ضلع بھر کے بالائی علاقوں، گھنے جنگلات، نرسریوں، باغات اور دیگر حساس مقامات پر بڑے پیمانے پر تلاشی کارروائیاں شروع کیں۔
سرکاری ذرائع کے مطابق یہ وسیع پیمانے کے آپریشنز سیکورٹی فورسز کے اشتراک سے مخصوص سیکورٹی جائزوں کی بنیاد پر انجام دیے گئے تاکہ سالانہ یاترا کو نقصان پہنچانے کی کسی بھی ممکنہ کوشش کو ناکام بنایا جا سکے۔
تلاشی کارروائیاں ضلع کے مختلف حساس مقامات، خصوصاً دور دراز اور دشوار گزار علاقوں میں انجام دی گئیں جہاں سیکورٹی اہلکاروں نے مکمل کومبنگ اور ایریا ڈومینیشن آپریشنز چلائے۔ پولیس ٹیموں نے دیگر سیکورٹی ایجنسیوں کی معاونت سے جنگلاتی راستوں، بلند پہاڑی علاقوں، باغات اور نرسریوں کی باریک بینی سے تلاشی لی تاکہ کسی بھی ممکنہ سیکورٹی خطرے کا خاتمہ کیا جا سکے۔
ذرائع نے بتایا کہ ان کارروائیوں کے دوران متعدد اوور گراؤنڈ ورکرز (او جی ڈبلیوز)، جن پر ملی ٹینٹ نیٹ ورکس کو لاجسٹک معاونت فراہم کرنے کا شبہ ہے، کو پوچھ گچھ کے لیے حراست میں لیا گیا۔ ان کی سرگرمیوں اور ممکنہ روابط کی تحقیقات یاترا سے قبل احتیاطی سیکورٹی اقدامات کے تحت کی جا رہی ہیں۔
سینئر پولیس حکام کا کہنا ہے کہ یہ کارروائیاں ایک وسیع تر سیکورٹی حکمت عملی کا حصہ ہیں جس کا مقصد امن و امان برقرار رکھنا اور یاتریوں، مقامی باشندوں اور یاترا سے وابستہ تمام فریقوں کی حفاظت کو یقینی بنانا ہے۔
حکام نے کہا کہ کولگام پولیس دیگر سیکورٹی ایجنسیوں کے ساتھ مل کر مضبوط سیکورٹی گرڈ برقرار رکھنے کے لیے پرعزم ہے اور آنے والے دنوں میں بھی ضلع بھر میں ایریا ڈومینیشن اور سرچ آپریشنز جاری رکھے جائیں گے۔
شری امرناتھ جی یاترا جلد ہی شروع ہونے والی ہے اور اس سلسلے میں کشمیر بھر میں سیکورٹی انتظامات مزید سخت کر دیے گئے ہیں۔ خاص طور پر حساس راستوں، ٹرانزٹ کیمپوں اور ان سے ملحقہ علاقوں پر خصوصی توجہ دی جا رہی ہے۔
ادھر مقامی باشندوں سے بھی اپیل کی گئی ہے کہ وہ سیکورٹی ایجنسیوں کے ساتھ مکمل تعاون کریں اور کسی بھی مشتبہ نقل و حرکت یا سرگرمی کی اطلاع فوری طور پر قریبی پولیس اسٹیشن کو دیں تاکہ امن و امان اور عوامی سلامتی کو برقرار رکھا جا سکے۔
۔۔۔۔۔۔۔
