ایجنسیز
سرینگر؍۱۸جون
پیپلز ڈیموکریٹک پارٹی (پی ڈی پی) کی رہنما التجا مفتی نے جمعرات کو کہا کہ وادی کشمیر کے نازک ماحولیاتی نظام کے تحفظ کے لیے یہاں داخل ہونے والی سیاحتی گاڑیوں کی تعداد پر حد مقرر کی جانی چاہیے۔
التجا مفتی نے سوشل میڈیا پلیٹ فارم ایکس پر ایک پوسٹ میں کہا کہ اس سال سری نگر، خصوصاً بلیوارڈ۔نشاط شاہراہ پر ٹریفک میں اچانک اضافہ بڑی حد تک اس وجہ سے ہوا ہے کہ سیاح فضائی سفر کے بجائے اپنی گاڑیوں میں وادی کا رخ کر رہے ہیں۔
پی ڈی پی لیڈر نے کہا، ’’سڑکوں پر بڑھتے ہوئے دباؤ اور کشمیر کے نازک ماحول کو مدنظر رکھتے ہوئے سیاحتی گاڑیوں کی تعداد محدود کرنے کے لیے اقدامات کیے جانے چاہئیں۔‘‘
التجا نے کہا کہ نہ تو کشمیر کی سڑکیں اور نہ ہی یہاں کا ماحولیاتی نظام گاڑیوں کے اس بے پناہ رش کا بوجھ برداشت کر سکتا ہے۔انہوں نے مزید کہا، ’’امید ہے کہ حکومت اس معاملے کا سنجیدگی سے نوٹس لے گی۔‘‘
