دہشت گردی سے مبینہ روابط پر محکمہ بجلی کا انسپکٹر برطرف

ایجنسیز

سرینگر؍۱۷جون

            جموں و کشمیر حکومت نے دہشت گردانہ سرگرمیوں سے مبینہ تعلقات کے الزام میں محکمہ بجلی ترقی(پی ڈی ڈی ) کے ایک ملازم کی خدمات ختم کر دی ہیں۔

            سرکاری ذرائع کے مطابق محمد شفیع ملک، ولد ارونی، بیجبہاڑہ، ضلع اننت ناگ، جو محکمہ بجلی میں انسپکٹر کے عہدے پر تعینات تھے، کو سرکاری ملازمت سے برطرف کر دیا گیا ہے۔

            ۵۱ سالہ محمد شفیع ملک بارہویں جماعت تک تعلیم یافتہ ہیں اور حسن پورہ تویلہ، بیجبہاڑہ میں بطور انسپکٹر خدمات انجام دے رہے تھے۔ حکام کے مطابق ان کے خلاف دہشت گردانہ سرگرمیوں سے مبینہ روابط کے الزامات کی بنیاد پر یہ کارروائی عمل میں لائی گئی ہے۔

            سرکاری ذرائع نے بتایا کہ محمد شفیع ملک کا نام پولیس اسٹیشن بیجبہاڑہ میں درج متعدد مقدمات میں شامل ہے۔

            ان میں ایک ایف آئی آرشامل ہے جو تعزیرات ہند کی متعلقہ دفعات ؍اور آرمز ایکٹ کی دفعات۷ /۲۷ے تحت درج کی گئی تھی۔

            ایک سرکاری عہدیدار نے بتایا کہ حکومت نے دہشت گردی سے کسی بھی قسم کے روابط رکھنے والوں کے خلاف ’’زیرو ٹالرنس‘‘ پالیسی اختیار کر رکھی ہے اور اسی پالیسی کے تحت یہ کارروائی انجام دی گئی ہے۔

            حکام کے مطابق حکومت ایسے عناصر کے خلاف کارروائی جاری رکھے گی جن پر دہشت گردی یا ملک دشمن سرگرمیوں سے وابستگی کے الزامات ہوں۔