ایجنسیز
سری نگر؍۳۰مئی
جموں و کشمیر حکومت نے اطلاع دی ہے کہ آٹھواں مرکزی پے کمیشن مختلف فریقین، بشمول سرکاری ملازمین، یونینوں اور انجمنوں کے ساتھ تبادلۂ خیال کیلئے۳۱مئی سے۵ جون تک مرکز کے زیر انتظام علاقے کا دورہ کرے گا۔
محکمہ خزانہ (کوڈز ڈویژن) کی جانب سے جاری ایک سرکاری مراسلے کے مطابق کمیشن نے جموں و کشمیر حکومت کے ساتھ ایک خصوصی اجلاس اور پریزنٹیشن سیشن یکم جون۲۰۲۶کو صبح۱۱ بجے سے دوپہر ایک بجے تک ایس کے آئی سی سی، سینٹور ہوٹل کے نزدیک، سری نگر میں واقع میٹنگ ہال میں مقرر کیا ہے۔
اجلاس کی صدارت چیف سیکریٹری کریں گے جبکہ مختلف محکموں کے اعلیٰ افسران اس میں شرکت کریں گے۔ مدعو کیے گئے حکام میں محکمہ جل شکتی، محکمہ بجلی، سیاحت، زراعت، خزانہ، محکمہ تعمیرات عامہ (آر اینڈ بی) اور وزیر اعلیٰ سیکریٹریٹ کے ایڈیشنل چیف سیکریٹریز شامل ہیں۔
اس کے علاوہ محکمہ داخلہ، لیفٹیننٹ گورنر سیکریٹریٹ اور محکمہ انتخابات کے پرنسپل سیکریٹریز، جنرل ایڈمنسٹریشن ڈیپارٹمنٹ کے کمشنر سیکریٹری، محکمہ قانون، انصاف و پارلیمانی امور کے کمشنر سیکریٹری اور محکمہ خزانہ کے تمام سربراہان کو بھی اجلاس میں شرکت کی ہدایت دی گئی ہے۔
اس دورے کا مقصد تنخواہوں کے ڈھانچے، ملازمت کی شرائط اور دیگر متعلقہ معاملات پر مختلف فریقین کی آراء، تجاویز اور مطالبات حاصل کرنا ہے تاکہ آٹھواں مرکزی پے کمیشن اپنے جائزہ عمل کے دوران ان نکات کو مدنظر رکھ سکے۔
