’ریاست ترقی کی نئی بلندیوں کو چھو رہی ہے‘
ڈی آئی پی آر
سرینگر؍۱۶ مئی
جموں و کشمیر لوک بھون نے سرینگر میں ریاست سکم کے یومِ ریاست کی تقریب منعقد کی۔
اس تقریب میں طلبہ، سیکورٹی اہلکاروں اور مرکز کے زیر انتظام علاقے میں مقیم سکم کے لوگوں نے شرکت کی۔
تقریب سے خطاب کرتے ہوئے لیفٹیننٹ گورنر منوج سنہا نے سکم کے عوام کو اس موقع پر دلی مبارکباد پیش کی۔
لیفٹیننٹ گورنر نے کہا، ’’گرو پدم سمبھوا کی مقدس سرزمین سکم، ہمالیائی ریاستوں اور مرکز کے زیر انتظام علاقوں کے درمیان ایک روشن ستارے کی مانند چمکتی ہے۔ سکم کو نامیاتی کھیتی، امن اور روحانیت کے عالمی نمونے کے طور پر تسلیم کیا جاتا ہے۔ اس کی حیرت انگیز لسانی تنوع اور شاندار ثقافتی وراثت اسے عالمی سطح پر منفرد مقام عطا کرتی ہے۔‘‘
سنہا نے زور دے کر کہا کہ وزیر اعظم نریندر مودی کی رہنمائی میں سکم ترقی کی نئی بلندیوں کو چھو رہا ہے اور ملک کے وژن میں صفِ اول پر کھڑا ہے۔
ایل جی نے کہا کہ بھارت کی تمام ریاستوں اور مرکز کے زیر انتظام علاقوں کے درمیان جذباتی رشتہ اتحاد، ہمدردی اور بھائی چارے جیسی بنیادی اقدار میں گہرائی سے پیوست ہے۔
لیفٹیننٹ گورنر نے اس بات پر بھی روشنی ڈالی کہ جولائی۲۰۲۲میں جموں و کشمیر اور سکم کے درمیان باغبانی کے شعبے میں طے پانے والے تاریخی معاہدے نے دونوں خطوں کے نوجوانوں، کسانوں اور محققین کے درمیان روابط کو فروغ دینے میں انقلابی نتائج برآمد کیے ہیں۔
ایل جی نے کہا، ’’میں اس فروغ پاتی ہوئی شراکت داری کو ’ایک بھارت شریشٹھ بھارت‘ کی بہترین مثال سمجھتا ہوں۔ باہمی تعاون کا یہی جذبہ ’وکست بھارت‘ کے ہمارے مشترکہ عزم کو حقیقت میں بدلنے میں اہم کردار ادا کرے گا۔‘‘
لیفٹیننٹ گورنر نے کہا، ’’میں دعا گو ہوں کہ سکم، جو اپنی دلکش قدرتی خوبصورتی، پائیدار ترقی اور نامیاتی کھیتی میں نمایاں کامیابیوں کے لیے جانا جاتا ہے، ترقی اور خوشحالی کی نئی منزلیں طے کرتا رہے، اور اس کے تمام شہری خوشحال اور سلامت رہیں۔‘‘
