ایجنسیز
سرینگر؍۱۳مئی
نیشنل کانفرنس کے رہنما اور رکن اسمبلی تنویر صادق نے بدھ کے روز قائدِ حزبِ اختلاف سنیل کمار شرما کے عمر عبداللہ حکومت پر تنقیدی بیانات کا جواب دیتے ہوئے کہا کہ بی جے پی رہنما آسام سے واپس آنے کے بعد ’جموں و کشمیر کی سیاست بھول گئے ہیں‘۔
سنیل شرما کے اس بیان پر ردِعمل دیتے ہوئے کہ نیشنل کانفرنس ایک ’ڈوبتا ہوا جہاز‘ ہے اور ہر صورت ڈوب جائے گی، تنویر صادق، جو حکمران جماعت کے چیف ترجمان بھی ہیں، نے کہا کہ بی جے پی رہنما جموں و کشمیر کی سیاسی حقیقتوں سے کٹے ہوئے ہیں اور قائدِ حزبِ اختلاف کا عہدہ کھونے کے خوف میں بے بنیاد بیانات دے رہے ہیں۔
صادق نے سری نگر میں صحافیوں سے گفتگو کرتے ہوئے کہا’’وہ خواب دیکھ رہے ہیں۔ وہ آسام سے آئے ہیں اور جموں و کشمیر کی سیاست بھول گئے ہیں۔ میں انہیں دوبارہ جگانا چاہتا ہوں۔ میں ان کے گھر جاؤں گا اور انہیں کافی پلاؤں گا تاکہ انہیں سمجھ آئے کہ یہ جموں و کشمیر ہے، آسام نہیں‘‘۔
واضح رہے کہ سنیل شرما نے۲۰۲۶کے آسام اسمبلی انتخابات میں بی جے پی کے الیکشن شریک انچارج (سہا پربھاری) کے طور پر خدمات انجام دی تھیں۔
این سی رہنما نے کہا کہ جموں و کشمیر کے عوام نے نیشنل کانفرنس کو واضح مینڈیٹ دیا ہے اور بی جے پی و پی ڈی پی دونوں کو مسترد کر دیا ہے۔
صادق نے کہا’’لوگوں نے انتخابات میں بھرپور حصہ لیا اور مینڈیٹ نیشنل کانفرنس کو دیا، نہ کہ بی جے پی یا پی ڈی پی کو۔ نیشنل کانفرنس یہاں قائم رہنے والی جماعت ہے اور پانچ سال بعد بھی دوبارہ اقتدار میں واپس آئے گی‘‘۔
میراتھن اور کھیلوں کی سرگرمیوں سے متعلق تنقید کا دفاع کرتے ہوئے صادق نے کہا کہ ایسے پروگرام صحت مند طرزِ زندگی کو فروغ دیتے ہیں اور عوامی شمولیت کی عکاسی کرتے ہیں۔انہوں نے کہا’’جو لوگ کرکٹ، فٹبال اور دیگر کھیل کھیلتے ہیں وہ ایسی سرگرمیوں کی اہمیت کو سمجھتے ہیں۔ وہ بار بار دوڑ اور میراتھن کی بات کرتے ہیں کیونکہ انہیں اس کے علاوہ کچھ سمجھ نہیں آتا‘‘۔
صادق نے مزید الزام لگایا کہ سنیل شرما اپنی ہی جماعت کے اندر دباؤ کا شکار ہیں۔انہوں نے کہا’’وہ اسمبلی میں ناکام ہوئے اور اب انہیں ڈر ہے کہ کہیں قائدِ حزبِ اختلاف کا عہدہ بھی ان سے نہ لے لیا جائے، اسی لیے وہ اس قسم کے بیانات دے رہے ہیں‘‘۔
این سی رہنما نے پی ڈی پی کی جانب سے بیک ڈور تقرریوں کے الزامات کو بھی مسترد کرتے ہوئے کہا کہ پی ڈی پی نے اپنے دورِ حکومت میں بدعنوانی اور بے ضابطگیوں کو فروغ دیا تھا۔انہوں نے پی ڈی پی رہنماؤں کو چیلنج کرتے ہوئے کہا کہ وہ موجودہ نیشنل کانفرنس حکومت یا اس کے وزراء کے خلاف بدعنوانی کا ایک بھی معاملہ ثابت کریں۔
صادق نے کہا’’وہ ایک ایسے شخص کی نشاندہی کریں جو یہ کہہ سکے کہ ہماری حکومت یا کسی وزیر نے ایک روپیہ بھی لیا ہو۔ ورنہ پوری دنیا جانتی ہے کہ ان کے اپنے رشتہ دار فہرستیں لے کر بیٹھتے تھے اور تبادلوں و تعیناتیوں کے نرخ طے کرتے تھے‘‘۔
کسی فرد کا نام لیے بغیر صادق نے الزام لگایا کہ پی ڈی پی رہنماؤں نے بدعنوانی کو ادارہ جاتی شکل دی تھی اور اب این سی حکومت کے خلاف ’جھوٹے الزامات‘ لگا رہے ہیں۔ انہوں نے دعویٰ کیا کہ پی ڈی پی دورِ حکومت میں تبادلوں اور تقرریوں کو مبینہ طور پر پیسے کمانے کا ذریعہ بنایا گیا تھا اور پارٹی کی جانب سے مسلسل لگائے جانے والے الزامات دراصل اپنی کارکردگی سے توجہ ہٹانے کی کوشش ہیں۔
شراب فروخت سے متعلق تنقید کا جواب دیتے ہوئے صادق نے پی ڈی پی اور نیشنل کانفرنس کے ادوارِ حکومت کا موازنہ بھی کیا۔ انہوں نے کہا کہ سابق وزیر خزانہ عبد الرحیم راتھر کے۱۵سالہ دور یا گزشتہ ڈیڑھ سال میں وزیر اعلیٰ عمر عبداللہ کے دور میں ایک بھی آف لائن شراب لائسنس جاری نہیں کیا گیا۔انہوں نے الزام لگایا’’نیشنل کانفرنس کے دور میں ایک بھی آف لائن شراب لائسنس جاری نہیں ہوا، جبکہ پی ڈی پی حکومت کے دوران تقریباً۱۰۰لائسنس جاری کیے گئے۔ اس لیے سوالات پی ڈی پی سے کیے جانے چاہئیں کہ ان کے دور میں اتنے شراب لائسنس کیوں جاری کیے گئے‘‘۔
