صدر جمہوریہ نے 15 نرسنگ اہلکاروں کو نیشنل فلورنس نائٹنگیل ایوارڈز سے نوازا

نئی دہلی، 12 مئی (یو این آئی) صدر جمہوریہ دروپدی مرمو نے منگل کو راشٹرپتی بھون میں 15 نرسنگ اہلکاروں کو ان کی شاندار خدمات کے اعتراف میں سال 2026 کے لیے نیشنل فلورنس نائٹنگیل ایوارڈز پیش کیے۔
راشٹرپتی بھون سکرٹریٹ کے مطابق، نرسوں کے عالمی دن کے موقع پر دیے گئے ان ایوارڈز کے فاتحین میں چھ معاون نرسیں (اے این ایم) اور نو نرسیں شامل ہیں۔ ایوارڈ پانے والوں میں لداخ سے معاون نرس محترمہ کلوندر پرہی، مہاراشٹر سے محترمہ اجولا مہادیو سویم، میزورم سے محترمہ لالینتھانگی نامٹے، سکم سے محترمہ مدھو مالا گرونگ، اتراکھنڈ سے محترمہ پوجا پرمار رانا اور مغربی بنگال سے محترمہ گیتا کرماکر شامل ہیں۔
مزید برآں، یہ ایوارڈ حاصل کرنے والوں میں مرکز کے زیر انتظام علاقہ چندی گڑھ سے محترمہ پونم ورما، دادرا اور نگر حویلی نیز دمن اور دیو سے محترمہ دیپا بیجو، دہلی سے ڈاکٹر شرون کمار ڈھاکا، گوا سے محترمہ رکشا روپو پروتکر، کرناٹک سے محترمہ کویتا جگن ناتھ، کیرالہ سے محترمہ منجو مول وی ایس، لکشدیپ سے محترمہ عائشہ بی بی کے، تمل ناڈو سے پروفیسر (ڈاکٹر) آر شنکر شانموگم اور آئی ایچ کیو، وزارت دفاع (آرمی)، دہلی سے میجر جنرل لسمّا پی وی شامل ہیں۔
نیشنل فلورنس نائٹنگیل ایوارڈز- 2026 کے لیے اپنے پیغام میں صدر جمہوریہ نے کہا کہ یہ موقع ان نرسنگ اہلکاروں اور صحت کی دیکھ بھال کرنے والے پیشہ ور افراد کے انمول تعاون کا بھرپور اعتراف ہے جو ہمدردی اور انتھک لگن کے ساتھ قوم کی خدمت کرتے ہیں۔ نرسنگ اہلکار خدمت کے اعلیٰ ترین معیار کی مثال پیش کرتے ہیں اور اکثر مشکل ترین حالات میں بھی معیاری صحت کی دیکھ بھال فراہم کرنے میں اہم کردار ادا کرتے ہیں۔ انہوں نے کہا، "میں تمام ایوارڈ یافتہ افراد کو ان کے فرض کے تئیں باعث تحریک وفاداری اور مریضوں کی دیکھ بھال کے اعلیٰ ترین معیار کو برقرار رکھنے کی انتھک کوششوں پر مبارکباد دیتی ہوں۔”
نیشنل فلورنس نائٹنگیل ایوارڈز کا قیام سال 1973 میں حکومتِ ہند کی وزارت صحت اور خاندانی بہبود کی جانب سے معاشرے میں نرسنگ اہلکاروں کی قابل ستائش خدمات کے اعتراف کی علامت کے طور پر کیا گیا تھا۔