سرینگر؍۱۲مئی
جموں و کشمیر کے محکمۂ صحت و طبی تعلیم نے پیر کے روز صحت کے شعبے میں بڑے پیمانے پر ردوبدل کرتے ہوئے یونین ٹیریٹری کے مختلف اضلاع اور طبی اداروں میں تعینات۲۲ ڈاکٹروں کے تبادلے اور نئی تقرریوں کے احکامات جاری کیے۔
ایک حکومتی حکم نامہ کے مطابق یہ تبادلے ’’انتظامی مفاد اور مریضوں کی بہتر نگہداشت‘‘ کو مدنظر رکھتے ہوئے فوری طور پر عمل میں لائے گئے ہیں۔
اہم تقرریوں میں ڈاکٹر سنجے اروڑا کو اِنچارج اسٹیٹ ملیریالوجسٹ تعینات کیا گیا ہے، جبکہ ڈاکٹر راشمی شرما کو اِنچارج ایپیڈیمیالوجسٹ مقرر کیا گیا۔ ڈاکٹر سنیل کیلو اور ڈاکٹر بشیر احمد ملک کو بالترتیب جموں اور کشمیر ڈویژن میں خاندانی بہبود، ماں و بچہ صحت اور ٹیکہ کاری کے اِنچارج اسسٹنٹ ڈائریکٹرز تعینات کیا گیا ہے۔
ڈاکٹر ونود شرما کو اِنچارج چیف میڈیکل آفیسر ڈوڈہ مقرر کیا گیا ہے، جبکہ ڈاکٹر سنجے کمار بھٹ کو اِنچارج سی ایم او کشتواڑ کی ذمہ داری سونپی گئی ہے۔ ڈاکٹر بھجن کور کا تبادلہ بطور اِنچارج سی ایم او بانڈی پورہ کیا گیا ہے۔
