ایجنسیز
سرینگر؍۲مئی
حکام کے مطابق ہفتہ کے روز جموں و کشمیر کے ضلع پلوامہ میں سیکورٹی فورسز نے دہشت گردوں کے ایک معاون (اوور گراؤنڈ ورکر) کو گرفتار کر لیا۔
حکام نے بتایا کہ گرفتار شخص کی شناخت عمر ملک کے طور پر ہوئی ہے، جو جنوبی کشمیر کے کچی پورہ علاقے کا رہائشی ہے۔
حکام کے مطابق عمر ملک کے قبضے سے ایک اسٹار پستول، دو کارتوس، ایک میگزین، ایک چینی گرینیڈ، ایک پاکستانی گرینیڈ اور ایک موبائل فون برآمد کیا گیا۔
مزید تفصیلات کا انتظار ہے۔
دریں اثنا، سیکورٹی فورسز نے جمعہ کے روز ضلع کشتواڑ میں ایک دہشت گردانہ ٹھکانے کا پردہ فاش کرتے ہوئے بھاری مقدار میں اسلحہ، گولہ بارود اور دھماکہ خیز مواد برآمد کیا۔
ضلع کے چھاترو علاقے میں سرچ آپریشن کے دوران سیکورٹی فورسز نے سگدی بھٹہ کے بجماندو جنگل میں قائم اس ٹھکانے کو تباہ کیا۔حکام نے بتایا کہ یہ ٹھکانہ ایک ایسے دہشت گرد کمانڈر کا تھا جسے فورسز پہلے ہی ہلاک کر چکی تھیں۔
برآمد شدہ اسلحہ اور گولہ بارود میں ایک کاربائن بندوق بمع ایک میگزین، ایک پستول بمع ایک میگزین، ایک سلنگ، ایک انڈر بیرل گرینیڈ لانچر (یو بی جی ایل) بمع ایک۵۱ ملی میٹر راکٹ اور چار ڈیٹونیٹر شامل ہیں۔
اس کے علاوہ۹ملی میٹرکے۹۷زندہ کارتوس۷ء۶۲ملی میٹر کے۱۸زندہ کارتوس، ایک پل تھرو، ایک کلو گرام دھماکہ خیز مواد، ایک کین ووڈ ریڈیو سیٹ اور دو موٹرولا ریڈیو سیٹس بھی برآمد کیے گئے۔
