ایل جی سنہا کا سکیورٹی، نشہ مکت مہم اور امر ناتھ یاترا کی تیاریوں کا جائزہ
(ڈی آئی پی آر)
جموں؍۲۹؍ اپریل
لیفٹیننٹ گورنر منوج سنہا نے آج جموں ڈویژن کے ڈپٹی کمشنرز (ڈی سیز) اور سینئر سپرنٹنڈنٹس آف پولیس (ایس ایس پیز) کے ساتھ ایک اعلیٰ سطحی اجلاس کی صدارت کی، جس میں سکیورٹی صورتحال، ’نشہ مکت جموں و کشمیر ابھیان‘ کی پیش رفت اور آئندہ یاتراؤں کی تیاریوں کا جائزہ لیا گیا۔
اجلاس کے دوران ڈی سیز اور ایس ایس پیز نے اپنے اپنے اضلاع میں امن و قانون اور سکیورٹی صورتحال سے لیفٹیننٹ گورنر کو آگاہ کیا۔ انہوں نے ’نشہ مکت جموں و کشمیر ابھیان‘کی۱۰۰ روزہ مہم کی پیش رفت اور مختلف یاتراؤں، بشمول شری امرناتھ جی یاترا، شری کوثر ناگ یاترا اور شری بدھا امرناتھ جی یاترا کی تیاریوں کے بارے میں بھی تفصیلات پیش کیں۔
لیفٹیننٹ گورنر نے پولیس، سول انتظامیہ اور سکیورٹی فورسز کے درمیان مربوط تال میل کو یقینی بنانے کی ہدایت دی۔ انہوں نے بلاک اور تھانہ دیوس کے باقاعدہ انعقاد پر بھی زور دیا تاکہ عوامی شکایات کا بروقت ازالہ کیا جا سکے۔
سنہا نے منشیات کے خلاف جنگ میں نتائج پر مبنی اقدامات اور پورے معاشرے کی شمولیت کی ضرورت پر زور دیتے ہوئے منشیات فروشوں اور اسمگلروں کے خلاف سخت کارروائی کی ہدایت دی۔
لیفٹیننٹ گورنر نے جموں ڈویژن میں نارکو کوریڈورز کی نشاندہی کر کے ان علاقوں میں سرگرم نیٹ ورکس اور ہاٹ اسپاٹس کو مکمل طور پر ختم کرنے پر زور دیا۔ انہوں نے عالمی ادارہ صحت کے معیاری طریقہ کار کے مطابق خطہ وار منشیات کے رجحانات اور کمزوری کے اشاریہ پر مبنی ایک جامع مطالعہ کرنے کی بھی ہدایت دی۔
شری امرناتھ جی یاترا۲۰۲۶؍اور دیگر آئندہ یاتراؤں کے حوالے سے لیفٹیننٹ گورنر نے ڈی سیز اور ایس ایس پیز کو اپنے اپنے اضلاع میں انتظامات کا جامع جائزہ لینے کی ہدایت دی۔
ایل جی نے ڈی سیز کو ’وائبریٹ ولیجز پروگرام‘ کے مؤثر نفاذ کو یقینی بنانے اور دیہی صحت، ترقی، معاشی تبدیلی اور سماجی بہبود کے اہداف کو حاصل کرنے کی ہدایت دی، نیز غیر متعدی بیماریوں کی۱۰۰فیصد اسکریننگ کو یقینی بنانے پر زور دیا۔
لیفٹیننٹ گورنر نے سکیورٹی گرڈ کو مزید مضبوط بنانے کے لیے تمام سکیورٹی ایجنسیوں کے درمیان غیر متزلزل تال میل کی ہدایت دیتے ہوئے کہا کہ ابھرتے خطرات کے خلاف ایک مضبوط اور ناقابلِ تسخیر حفاظتی حصار قائم کیا جائے۔ انہوں نے دہشت گردوں کو پناہ دینے والے افراد اور او جی ڈبلیوز کے خلاف سخت ترین کارروائی کا حکم دیتے ہوئے واضح کیا کہ قومی سلامتی کو خطرہ پہنچانے والوں کے لیے زیرو ٹالرنس کی پالیسی اپنائی جائے گی۔
اجلاس کے دوران جموں و کشمیر کی مجموعی سکیورٹی صورتحال کا جائزہ لیا گیا، خصوصاً سالانہ امرناتھ یاترا کے پُرامن اور محفوظ انعقاد کو یقینی بنانے پر زور دیا گیا، جو ایک اہم مذہبی یاترا ہے اور جس میں ہزاروں عقیدت مند شرکت کرتے ہیں۔
حکام کے مطابق، بات چیت کے دوران حساس علاقوں میں حفاظتی اقدامات کو مزید مضبوط بنانے اور چوکس رہنے کی ضرورت پر بھی زور دیا گیا۔
ذرائع کے مطابق لیفٹیننٹ گورنر نے سکیورٹی ایجنسیوں کے درمیان بہتر تال میل اور کسی بھی ہنگامی صورتحال سے نمٹنے کے لیے بروقت ردعمل کے نظام کو یقینی بنانے کی ہدایت دی۔
میٹنگ میں منشیات سے پاک معاشرے کے قیام کے لیے جاری مہم کا بھی جائزہ لیا گیا، جس میں منشیات کے خلاف سخت کارروائی اور عوامی آگاہی مہمات پر توجہ مرکوز کی گئی۔
حکام نے منشیات کے استعمال کی روک تھام کے لیے انسدادِ منشیات مہم اور نفاذی اقدامات کو مزید مؤثر بنانے پر بھی تبادلہ خیال کیا۔
اجلاس میں چیف سیکریٹری اتل ڈلو، ڈی جی پی نلین پربھات، پرنسپل سیکریٹری محکمہ داخلہ چندرکر بھارتی، اسپیشل ڈی جی کوآرڈینیشن پی ایچ کیو ایس جے ایم گلانی، اے ڈی جی پی سی آئی ڈی نتیش کمار، لیفٹیننٹ گورنر کے پرنسپل سیکریٹری ڈاکٹر مندیپ بھنڈاری، کمشنر/سیکریٹری صحت و طبی تعلیم ایم راجو، کمشنر/سیکریٹری سماجی بہبود سرمد حفیظ، کمشنر/سیکریٹری اسکول ایجوکیشن رام نواس شرما، ڈویژنل کمشنر جموں، آئی جی پی جموں، ڈی آئی جیز، اور جموں ڈویژن کے ڈی سیز و ایس ایس پیز نے شرکت کی۔
