ایجنسیز
کولگام؍۲۵؍اپریل
۱۰۰روزہ نشہ مکت بھارت ابھیان کے تحت جاری سخت نفاذی مہم کے سلسلے میں ڈرگ کنٹرول اتھارٹی کولگام نے ضلع بھر میں وسیع پیمانے پر چھاپے اور معائنے انجام دیے، جن میں کولگام قصبہ، پہلو، دیوسر اور دور دراز علاقے جیسے ڈی کے مارگ، قاضی گنڈ، فریسل، کدر، بہی باغ اور تنگجن شامل ہیں۔
معائنوں کے دوران۱۱لائسنس معطل کیے گئے، جبکہ کئی دکانوں کو شوکاز نوٹس جاری کیے گئے اور بعض کو ڈرگز اینڈ کاسمیٹکس ایکٹ۱۹۴۰کی خلاف ورزی پر سیل کر دیا گیا۔
یہ نفاذی کارروائی پولیس کے ساتھ قریبی تال میل سے انجام دی گئی، جس میں پی ایس بہی باغ، پی ایس کولگام، پی ایس قائمہ، پی ایس قاضی گنڈ اور پی ایس دیوسر شامل تھے، تاکہ شیڈولڈ ادویات کے غلط استعمال کو روکا جا سکے اور سخت نگرانی کو یقینی بنایا جا سکے۔
نفاذی اقدامات کے ساتھ ساتھ آگاہی پروگرام بھی منعقد کیے گئے، جن میں کیمسٹ حضرات کو ہدایت دی گئی کہ وہ شیڈولڈ ادویات کا مکمل ریکارڈ برقرار رکھیں اور ان ادویات کی فروخت صرف رجسٹرڈ میڈیکل پریکٹیشنرز کے نسخے پر ہی کریں۔
مزید برآں، ایک اہم کارروائی کے تحت اپریل۲۰۲۶ میں چیف جوڈیشل مجسٹریٹ کولگام کی عدالت نے شیڈولڈ ادویات کی فروخت کا ریکارڈ برقرار نہ رکھنے کے کیس میں۲۰ ہزار روپے جرمانہ عائد کیا، جس سے خلاف ورزی کرنے والے کیمسٹوں کو سخت پیغام دیا گیا کہ وہ قوانین کی مکمل پابندی کریں۔
