ایجنسیز
سرینگر؍۱۸؍اپریل
جموں کشمیر انتظامیہ نے ہفتہ کے روز ممنوعہ جماعتِ اسلامی سے منسلک۵۸؍اسکولوں کی انتظامی کمیٹیوں کو اپنے کنٹرول میں لینے کا حکم جاری کیا ہے۔
حکام کے مطابق یہ کارروائی انٹیلی جنس رپورٹوں اور اسکولوں کی انتظامی مدت ختم ہونے کے بعد عمل میں لائی گئی۔
ذرائع کے مطابق اسکول ایجوکیشن محکمہ نے وزارتِ داخلہ کی جانب سے جاری کردہ نوٹیفکیشنز کے تحت یہ اقدام اٹھایا، جن میں جماعتِ اسلامی کو غیر قانونی تنظیم قرار دیا گیا ہے۔
حکام نے بتایا کہ یہ۵۸فعال اسکول براہِ راست یا بالواسطہ طور پر جماعتِ اسلامی یا اس کے فلاحِ عام ٹرسٹ سے وابستہ پائے گئے۔
انتظامیہ نے تمام متعلقہ اضلاع کے ڈپٹی کمشنرز کو ہدایت دی ہے کہ وہ ان اسکولوں کا انتظام سنبھالیں اور نئی، تصدیق شدہ انتظامی کمیٹیاں تشکیل دینے کی تجاویز پیش کریں تاکہ طلبہ کی تعلیمی سرگرمیاں متاثر نہ ہوں۔
حکام کا کہنا ہے کہ اس اقدام کا مقصد قومی تعلیمی پالیسی (این ای پی) کے مطابق معیاری تعلیم کی فراہمی کو یقینی بنانا ہے اور اس بات کو یقینی بنایا جا رہا ہے کہ تعلیمی عمل میں کسی قسم کا خلل نہ آئے۔ اس سلسلے میں سرکاری ٹیمیں تمام۵۸؍اسکولوں میں تعینات کر دی گئی ہیں۔
