ایجنسیز
سرینگر؍۱۴؍اپریل
وزیر اعلیٰ عمر عبداللہ نے سدھ مہادیو،درانگا اور سنگھ پور،وائیلو ٹنل منصوبوں (این ایچ۲۴۴) کی منظوری اور تعاون پر وزیر اعظم نریندر مودی اور مرکزی وزیر برائے سڑک ٹرانسپورٹ و شاہراہیں نتن گڈکری کا تہہ دل سے شکریہ ادا کیا ہے۔
وزیر اعلیٰ نے کہا کہ یہ اہم بنیادی ڈھانچے کے منصوبے رابطہ کاری کو نمایاں طور پر مضبوط کریں گے، ہر موسم میں آمدورفت کو یقینی بنائیں گے اور چناب ویلی اور ملحقہ علاقوں میں اقتصادی ترقی کو تیز کریں گے۔
حکومت ہند نے جموں و کشمیر میں این ایچ۲۴۴پر یک طرفہ دوہری ٹیوب پر مشتمل سدھ مہادیو،درانگا ٹنل (۱۲ء۸۵کلومیٹر، جس میں دو لین اور پکی شولڈر اپروچز شامل ہیں) اور سنگھ پورہ،وائیلو دوہری ٹیوب ٹنل(۳۸ء۶۱کلومیٹر، جس میں دو لین اور پکی شولڈر اپروچز شامل ہیں) کی تعمیر کو منظوری دی ہے، جس کی مجموعی تخمینی لاگت۹۷۷۹ء۴۲کروڑ روپے ہے۔
وزیر اعلیٰ نے اپنے سابقہ اقدام کا حوالہ دیتے ہوئے کہا کہ گزشتہ سال جون میں انہوں نے وزیر اعظم اور مرکزی وزیر کو خط لکھ کر ان منصوبوں میں تاخیر کی نشاندہی کی تھی اور فوری غور کی اپیل کی تھی۔ انہوں نے زور دیا تھا کہ ان منصوبوں کو وزارتِ سڑک ٹرانسپورٹ و شاہراہیں کی این ایچ (او) اسکیم کے تحت ترجیحی بنیادوں پر لیا جائے تاکہ جموں و کشمیر اور ملک کی مجموعی ترقی کے وژن کے مطابق ان کی بروقت تکمیل یقینی بنائی جا سکے۔
اپنی مراسلت میں وزیر اعلیٰ نے اس بات پر بھی تشویش ظاہر کی تھی کہ اگرچہ این ایچ۲۴۴ پر دیگر قومی شاہراہ منصوبے این ایچ آئی ڈی سی ایل کے تحت آگے بڑھ رہے ہیں، لیکن ان دو اہم ٹنلز میں تاخیر چناب خطے کو متوقع سماجی و اقتصادی فوائد سے محروم کر رہی ہے اور اس کی معاشی پسماندگی کو دور کرنے کی کوششوں میں رکاوٹ بن رہی ہے۔
