تعلیمی اصلاحات اور طلبہ بہبود پر زور‘مختلف ایجنڈا نکات اور تجاویز کو اصولی منظوری /’ ہدف بند اصلاحات نافذ کی جائیں‘
ڈی آئی پی آر
جموں؍۸؍ اپریل
لیفٹیننٹ گورنر منوج سنہا نے بدھ کے روز لوک بھون جموں میں کلسٹر یونیورسٹی سری نگر کی یونیورسٹی کونسل کی دوسری میٹنگ کی صدارت کی۔
لیفٹیننٹ گورنر کی قیادت میں منعقدہ اس میٹنگ میں مختلف ایجنڈا نکات اور تجاویز کو اصولی منظوری دی گئی، جن میں عبدالاہد آزاد چیئر کے قیام اور یو جی سی رہنما خطوط کے مطابق این ای پی۲۰۲۰کے تحت پوسٹ گریجویٹ نصاب کے فریم ورک کو اپنانا شامل ہے۔
لیفٹیننٹ گورنر نے کلسٹر یونیورسٹی سری نگر کو ہدایت دی کہ تعلیمی معیار اور طلبہ کی فلاح و بہبود کو بہتر بنانے کے لیے ہدف بند اصلاحات نافذ کی جائیں۔ انہوں نے یونیورسٹی انتظامیہ کو جدید بنانے اور کارکردگی بڑھانے کے لیے ای آفس نظام کے مکمل نفاذ کی بھی ہدایت دی۔
سنہا نے یونین ٹیریٹری کی تمام یونیورسٹیوں میں غیر تدریسی عملے کی بھرتی کے قواعد میں یکسانیت لانے پر زور دیا تاکہ شفاف اور منظم نظام کو یقینی بنایا جا سکے۔
لیفٹیننٹ گورنر نے ’وکست بھارت یوتھ کنیکٹ‘ اور دیگر قومی یکجہتی پروگراموں کے تحت نوجوانوں کی زیادہ شمولیت کی بھی ہدایت دی، جبکہ نشہ مکت بھارت ابھیان کے تحت بیداری مہمات کو مزید تیز کرنے پر زور دیا۔
سنہا نے کہا’’یونیورسٹیوں اور تعلیمی اداروں کو معاشرے کے تئیں اپنی ذمہ داری نبھاتے ہوئے منشیات کے خلاف جنگ میں قائدانہ کردار ادا کرنا چاہیے‘‘۔
کلسٹر یونیورسٹی سری نگر کے وائس چانسلر پروفیسر محمد مبین نے یونیورسٹی کی پیش رفت رپورٹ پیش کی، جبکہ رجسٹرار نے کونسل کے سامنے مختلف ایجنڈا نکات پیش کیے۔
میٹنگ میں پروفیسر محمد مبین (وائس چانسلر، کلسٹر یونیورسٹی سری نگر)، پروفیسر امیش رائے (وائس چانسلر، جموں یونیورسٹی)، پروفیسر کے ایس چندرشیکھر (وائس چانسلر، کلسٹر یونیورسٹی جموں)، شیلندر کمار (ایڈیشنل چیف سیکریٹری، محکمہ خزانہ)، ڈاکٹر مندیپ کے بندھاری (پرنسپل سیکریٹری برائے لیفٹیننٹ گورنر)، پروفیسر راما شنکر دوبے (سابق وائس چانسلر، سینٹرل یونیورسٹی آف گجرات)، پروفیسر پی کے عبدالعزیز (سابق وائس چانسلر، علی گڑھ مسلم یونیورسٹی)، پروفیسر سید ولایت حسین رضوی (رجسٹرار، کلسٹر یونیورسٹی سری نگر) اور دیگر اراکین کونسل نے شرکت کی۔
