بالائی علاقوں میں برف باری بھی ہو سکتی ہے :محکمہ موسمیات
ایجنسیز
سرینگر؍۶اپریل
محکمہ موسمیات نے جموں و کشمیر میں منگل کی دوپہر سے ایک اور مرطوب سلسلے کی پیشگوئی کی ہے، جس کے تحت بدھ کی شام تک وقفے وقفے سے ہلکی سے درمیانی درجے کی بارش کا امکان ہے، جبکہ بالائی علاقوں میں برفباری بھی متوقع ہے۔
محکمہ کے مطابق جموں اور کشمیر دونوں ڈویژنوں کے چند مقامات پر درمیانی سے تیز بارش ہو سکتی ہے، جبکہ اونچائی والے علاقوں میں ہلکی سے درمیانی برفباری دیکھنے کو مل سکتی ہے۔
محکمہ موسمیات نے۷؍اور۸؍ اپریل کے دوران بعض علاقوں میں گرج چمک، ژالہ باری اور تیز ہواؤں(۴۰ سے ۵۰کلومیٹر فی گھنٹہ) کا انتباہ بھی جاری کیا ہے۔
ایڈوائزری میں خبردار کیا گیا ہے کہ مختصر وقفوں کے دوران شدید بارش کے باعث ندی نالوں میں طغیانی، حساس علاقوں میں لینڈ سلائیڈنگ اور نشیبی علاقوں میں پانی جمع ہونے کا خطرہ پیدا ہو سکتا ہے۔
محکمہ کے مطابق۹؍ اور۱۰؍ اپریل کو بھی مختلف مقامات پر ہلکی بارش اور بالائی علاقوں میں برفباری کے مختصر سلسلے جاری رہنے کا امکان ہے۔
