ٹرمپ کا ایرانی افزودہ یورینیئم قبضے میں لینے کا عندیہ، ماہرین نے خطرناک قرار دے دیا

واشنگٹن، 4 اپریل (یواین آئی) امریکی صدر ڈونلڈ ٹرمپ کی جانب سے ایران کے افزودہ یورینیئم کو قبضے میں لینے کے عندیے پر ماہرین نے شدید تشویش کا اظہار کرتے ہوئے اسے نہایت حساس اور خطرناک قدم قرار دیا ہے۔
بین الاقوامی سلامتی اور جوہری امور کے ماہرین کے مطابق کسی ملک کے جوہری مواد پر زبردستی قبضہ کرنا اس کی خودمختاری کی سنگین خلاف ورزی ہے اور اس سے براہِ راست فوجی تصادم کا خطرہ بڑھ سکتا ہے۔
ماہرین کا کہنا ہے کہ اس قسم کا اقدام تابکاری کے خطرات کو بھی جنم دے سکتا ہے اور بڑے انسانی بحران کا سبب بن سکتا ہے۔
انہوں نے مزید کہا کہ عالمی جوہری نگران ادارہ انٹرنیشنل اٹامک انرجی ایجنسی بھی اس طرح کے یکطرفہ اقدام کو بین الاقوامی قوانین اور معاہدوں کی خلاف ورزی تصور کرے گا۔
تجزیہ کاروں نے خبردار کیا ہے کہ ایسے اقدامات مشرقِ وسطیٰ میں وسیع جنگ کو جنم دے سکتے ہیں، جس میں روس اور چین جیسی عالمی طاقتوں کی مداخلت بھی ممکن ہے۔
ماہرین کے مطابق اس صورتحال کے نتیجے میں نہ صرف خطے میں عدم استحکام بڑھے گا بلکہ عالمی معیشت اور تیل کی قیمتوں پر بھی شدید اثرات مرتب ہو سکتے ہیں۔