ایجنسیز
راجوری؍۴؍اپریل
اینٹی کرپشن بیورو (اے سی بی) نے ہفتہ کے روز ضلع راجوری کے تھانہ تھنہ منڈی میں تعینات ایک پولیس ہیڈ کانسٹیبل کو مبینہ طور پر رشوت طلب کرنے اور وصول کرنے کے الزام میں رنگے ہاتھوں گرفتار کر لیا۔
گرفتار شدہ اہلکار کی شناخت ہیڈ کانسٹیبل محمد الیاس کے طور پر ہوئی ہے، جو تھانہ تھنہ منڈی میں تعینات تھا۔
حکام کے مطابق یہ کارروائی ریاسی کے رہائشی عبد الحمید کی جانب سے درج کرائی گئی شکایت کے بعد عمل میں لائی گئی، جس میں الزام لگایا گیا تھا کہ متعلقہ پولیس اہلکار ایک حادثے میں شامل گاڑی کو چھوڑنے کے لیے رقم کا مطالبہ کر رہا تھا۔
شکایت کنندہ کے مطابق وہ پہلے ہی۵ ہزار روپے ادا کر چکا تھا، تاہم اس کے باوجود اسے مزید۱۰ ہزار روپے دینے کے لیے دباؤ ڈالا جا رہا تھا، جس پر اس نے اے سی بی سے رجوع کیا۔
عبد الحمید نے بتایا کہ حادثہ اس وقت پیش آیا جب وہ شاہدرہ شریف جا رہا تھا۔ اس کے مطابق’’میں پہلے ہی۵ہزار روپے دے چکا تھا، مگر تفتیشی افسر مزید۱۰ہزار روپے مانگ رہا تھا اور کہا گیا کہ اگر رقم نہ دی تو کیس کو طول دیا جائے گا اور گاڑی بھی ریلیز نہیں کی جائے گی‘‘۔
حکام نے بتایا کہ شکایت موصول ہونے کے بعد اے سی بی نے جال بچھایا اور ملزم کو رشوت لیتے ہوئے رنگے ہاتھوں گرفتار کر لیا۔
بعد ازاں ملزم کو حراست میں لے لیا گیا اور معاملے کی مزید تحقیقات شروع کر دی گئی ہے۔
