ایئر انڈیا ایکسپریس طیارے کی ہارڈ لینڈنگ، تمام مسافر محفوظ

نئی دہلی، 11 مارچ (یواین آئی): ایئر انڈیا ایکسپریس کے ایک طیارے کی تھائی لینڈ کے شہر فوکیٹ میں ہارڈ لینڈنگ ہوئی، تاہم اس واقعے میں تمام مسافر محفوظ ہیں۔
ایئرلائن کے ایک ترجمان نے بتایا کہ 11 مارچ کو حیدرآباد سے فوکیٹ جانے والی پرواز کے اگلے پہیے میں فوکیٹ ایئرپورٹ پر اترتے وقت خرابی پیدا ہو گئی تھی۔ عملے نے تمام معیاری حفاظتی طریقہ کار پر عمل کیا اور مسافروں کو بحفاظت طیارے سے اتار لیا گیا۔
ذرائع کے مطابق پرواز نمبر آئی ایکس 938 نے صبح تقریباً 6:25 بجے حیدرآباد سے اڑان بھری تھی اور صبح تقریباً 8:55 بجے فوکیٹ میں لینڈ کیا۔ یہ بوئنگ 737-8 طیارہ تھا۔
فوکیٹ سے موصول ہونے والی تصاویر میں طیارہ رن وے پر کھڑا نظر آ رہا ہے اور اس کا اگلا پہیہ باہر نکلا ہوا دکھائی دے رہا ہے۔ طیارے کے رن وے پر موجود ہونے کے باعث مقامی وقت کے مطابق شام 6 بجے (ہندوستانی وقت کے مطابق شام 4:30 بجے) تک رن وے کو بند کر دیا گیا ہے۔