کیرالہ بی جے پی یووا مورچہ کارکنان نے سونیا گاندھی کی رہائش گاہ کے باہر احتجاج کیا

نئی دہلی، 27 فروری (یو این آئی) بھارتیہ جنتا پارٹی کے یوتھ ونگ بی جے پی یووا مورچہ کی کیرالہ یونٹ کے کارکنوں نے آج کانگریس کی سینئر رہنما سونیا گاندھی کی رہائش گاہ کے باہر شری بھگوان سوامی شرنم ایپا مندر سے متعلق مبینہ سونے کی چوری کے معاملے پر احتجاج کیا۔
سابق مرکزی وزیر انوراگ ٹھاکر کی قیادت میں ہوئے اس احتجاج میں کیرالہ بی جے پی یووا مورچہ کے کارکنوں نے اس معاملے کی فوری، غیر جانبدار اور شفاف جانچ کا مطالبہ کیا اور کانگریس قیادت کی خاموشی پر سوال اٹھایا۔ اس موقع پر بی جے پی یووا مورچہ کے قومی جنرل سکریٹری روہت چہل اور کیرالہ یووا مورچہ کے ریاستی صدر منو پرساد سمیت سیکڑوں کارکن موجود تھے۔
کارکنوں سے خطاب کرتے ہوئے انوراگ ٹھاکر نے کہا کہ مندروں کی املاک محض مادی اثاثہ نہیں بلکہ کروڑوں عقیدت مندوں کی آستھا ، بھروسے اور ثقافتی ورثے کی علامت ہے۔ اگر سونے کے زیورات یا مندر کی املاک میں کسی قسم کی چوری یا بے ضابطگی ہوئی ہے تو یہ صرف انتظامی ناکامی نہیں بلکہ آستھا کے ساتھ غداری ہے۔
انہوں نے الزام لگایا کہ اس سنگین معاملے پر کانگریس کی جانب سے واضح موقف سامنے نہیں آیا۔ عوام جاننا چاہتے ہیں کہ ذمہ دار کون ہے، جانچ کی کیا صورت حال ہے اور قصورواروں کے خلاف اب تک کیا کارروائی کی گئی ہے۔ اگر کسی بھی سطح پر غفلت، ملی بھگت یا بدعنوانی ہوئی ہے تو اسے بے نقاب کرنا ضروری ہے۔
انہوں نے کہا کہ مندروں کی جائیداد میں کسی بھی قسم کی بے ضابطگی یا چوری ناقابلِ قبول ہے۔ جن لوگوں نے چوری کی ہے وہ مبینہ طور پر محترمہ گاندھی کو تحفے میں سونا پیش کر رہے ہیں۔ ملک کے عقیدے سے متعلق معاملات میں صفر رواداری کی پالیسی اپنانا بی جے پی کا مؤقف رہا ہے۔ اگر کسی نے عقیدت مندوں کے بھروسے کو ٹھیس پہنچائی ہے تو اسے برداشت نہیں کیا جائے گا۔
انہوں نے مزید کہا کہ اپوزیشن اور خاص طور پر کانگریس نے پہلے ملک کو لوٹا اور اب مندروں کو بھی لوٹ کر کروڑوں ہندوؤں کی آستھا کے ساتھ کھلواڑ کر رہی ہے۔ انہوں نے مطالبہ کیا کہ اس معاملے کی جانچ مرکزی تفتیشی بیورو (سی بی آئی) سے کرائی جائے، رپورٹ جلد عوام کے سامنے لائی جائے اور قصورواروں کے خلاف سخت کارروائی یقینی بنائی جائے۔ ساتھ ہی مندروں کی املاک کی حفاظت کے لیے نگرانی کا مضبوط نظام قائم کیا جائے۔