ریکھا گپتا کو ماتری شری ایوارڈ سے نوازا گیا

نئی دہلی، 18 فروری (یو این آئی) دہلی کی وزیر اعلیٰ ریکھا گپتا کو سماج کے تئیں ان کے نمایاں کام کے لیے بدھ کو 50ویں ماتری شری ایوارڈ سے نوازا گیا۔
ماتری شری ایوارڈ کمیٹی کے کنوینر چیتن شرما نے آج یہاں کہا کہ وزیر اعلیٰ نے عوامی خدمت اور سماجی تحفظات کے میدان میں نمایاں خدمات انجام دی ہیں۔ ان کی اس شراکت کے لیے انہیں اعزاز سے نوازا گیا ہے۔ انہوں نے وزیر اعلیٰ کو بھارت ماتا کی مورتی اور ایک شال پیش کر کے ان کی عزت افزائی کی۔ اس موقع پر راشٹریہ سویم سیوک سنگھ سے وابستہ وویک شرما، مہامائی سیوا ٹرسٹ کے دیپک بجاج اور کمیٹی ممبر بٹی بھی موجود تھے۔
قابل ذکر ہے کہ ماتری شری ایوارڈ کی شروعات 1975 میں سینئر صحافی آنجہانی دنیش شرما نے کی تھی۔ اس کا مقصد معاشرے اور صحافت کے میدان میں نمایاں کام کرنے والے افراد کو اعزاز دینا تھا۔
اس سے قبل ایل کے اڈوانی، سشما سوراج، ارون جیٹلی، مدن لال کھرانہ، صاحب سنگھ ورما، رجت شرما، خوشونت سنگھ اور سرلا ماہیشوری سمیت کئی نامور شخصیات کو ماتری شری ایوارڈ سے نوازا جا چکا ہے۔