کرناہ میں ٹریکٹر حادثے میں دو بچے جاں بحق، ایک شدید زخمی

سرینگر/۳۰ دسمبر
ضلع کپواڑہ کے کرناہ علاقے کے گاؤں تاڈ میں منگل کے روز ایک ٹریکٹر کی زد میں آ کر کم از کم دو بچے جاں بحق جبکہ ایک شدید زخمی ہو گیا، حکام نے بتایا۔
ایک عہدیدار نے کہا کہ ٹریکٹر، تاڈ کے رہائشی اظہر احمد چلا رہے تھے، جب یہ بچوں سے ٹکرا گیا۔
مقامی لوگوں نے فوری طور پر زخمی بچوں کو سب ڈسٹرکٹ اسپتال (ایس ڈی ایچ) ٹنگڈھار پہنچایا، جہاں دو بچوں کو مردہ قرار دے دیا گیا، جبکہ تیسرا بچہ زیر علاج ہے اور اس کی حالت نازک بتائی جا رہی ہے۔
جاں بحق ہونے والوں کی شناخت آرزو بشیر (۷) اور آذان سجاد قریشی (۸) کے طور پر کی گئی ہے، جو دونوں گاؤں تاڈ کے رہائشی تھے۔ زخمی بچے کی شناخت شہناز احمد مغل (۹) کے طور پر کی گئی ہے۔
پولیس نے واقعے کا نوٹس لے لیا ہے اور حادثے کے اسباب جاننے کے لیے مزید تحقیقات شروع کر دی ہے۔
اس دوران منگل کے روز ضلع کپواڑہ میں ہی ترہگام پولیس اسٹیشن کے قریب سْومو گاڑی اور ایک لوڈ کیریئر کے درمیان پیش آنے والے سڑک حادثے میں کم از کم چھ مسافر معمولی زخمی ہو گئے۔
ایک عہدیدار نے ایک مقامی خبر رساں ایجنسی کو بتایا کہ حادثے میں ایک سوْمو گاڑی اور ایک لوڈ کیریئر شامل تھے۔انہوں نے کہا کہ تصادم کے فوراً بعد مقامی لوگ اور پولیس موقع پر پہنچے اور زخمی مسافروں کو طبی علاج کے لیے پی ایچ سی ترہگام منتقل کیا۔
عہدیدار کے مطابق زخمیوں کی شناخت کپواڑہ کے علاقوں ہائی ہامہ اور کرالپورہ کے رہائشیوں کے طور پر کی گئی ہے۔انہوں نے کہا کہ تمام زخمیوں کی حالت مستحکم بتائی جا رہی ہے، جبکہ واقعے سے متعلق مزید تفصیلات کا انتظار ہے۔ویب ڈیسک