اننت ناگ میں پولیس کا گاڑیوں کے ڈیلرز پر اچانک چھاپہ

سرینگر/۲۱نومبر
جنوبی ضلع اننت ناگ میں غیر قانونی سرگرمیوں پر شکنجہ کسنے اور سیکورٹی کو مزید مؤثر بنانے کے مقصد سے پولیس نے جمعہ کو گاڑیوں کے ڈیلرز کی اچانک اور سخت جانچ پڑتال کی۔
اعلیٰ حکام کی ہدایت پر شروع کی گئی اس مہم کا مقصد گاڑیوں کی خرید و فروخت کے نظام میں شفافیت لانا اور تمام ڈیلرز کو قانونی دائرے میں لانا تھا۔
اس دوران پولیس ٹیموں نے مختلف شوروم میں جا کر گاڑیوں کی رجسٹریشن فائلیں، اسٹاک کی تفصیلات، خرید و فروخت کے معاہدے اور خریدار و فروخت کنندہ کے شناختی ریکارڈ کی مکمل تفتیش کی۔
پولیس نے واضح کیا کہ کسی بھی ڈیلر کے پاس غیر رجسٹرڈ، مشکوک یا بغیر کاغذات والی گاڑی پائی گئی تو اس کے خلاف سخت کارروائی کی جائے گی۔
ڈیلرز کو تنبیہ کی گئی کہ وہ موٹر وہیکل ایکٹ کے تحت ریکارڈ کو بروقت اپڈیٹ کریں، تمام دستاویزات مکمل رکھیں اور خرید و فروخت کی اطلاع فوری طور پر پولیس کو فراہم کریں تاکہ گاڑیوں کے غلط استعمال کو بروقت روکا جاسکے ۔
پولیس حکام نے بتایا کہ ضلع میں قانون و نظم برقرار رکھنے کے لیے اس طرح کی چیکنگ آئندہ دنوں میں بھی جاری رہے گی اور کسی بھی خلاف ورزی کو برداشت نہیں کیا جائے گا۔
دریں اثنا سیکورٹی کو مضبوط بنانے اور صحت کے اداروں میں محفوظ اور ذمہ دار ماحول کو بر قرار رکھنے کے لئے گاندربل پولیس نے ضلع کے مختلف ہسپتالوں میں ڈاکٹروں اور عملے کے لاکروں کی اچانک جانچ کی۔
پولیس کا کہنا ہے کہ یہ جانچ مہمیں پولیس ٹیموں نے ہسپتال انتظامیہ کے تعاون سے انجام دیں تاکہ شفافیت اور سیکورٹی پروٹوکال پر صحیح عملدر آمد کو یقینی بنایا جا سکے ۔
انہوں نے کہا کہ اس کارروائی کا مقصد ہسپتال کے احاطے کے غلط استعمال کی روک تھام کو یقینی بنانا، غیر قانونی سرگرمیوں پر قابو پانا اور ادارہ جاتی نظم و نسق کو مضبوط کرنا ہے ۔
ایک پولیس ترجمان نے بتایا کہ جانچ کے دوران تمام لاکروں اور عملے کے اسٹوریج مقامات کی مکمل تلاشی لی گئی۔
ترجمان نے کہا کہ طبی اور نیم طبی عملے کو سیکورٹی کی اہمیت، مشکوک سرگرمیوں کی بر وقت اطلاع دینے اور ہسپتال کے مقامات کے غلط استعمال کو روکنے کے بارے میں آگاہی فراہم کی گئی۔
گاندربل پولیس نے یقین دہانی کرائی کہ عوامی اداروں کے تحفظ اور مریضوں، تیمار داروں اور صحت کے پیشہ ور افراد کے لئے محفوظ ماحول کو یقینی بنانے کے لئے آئندہ بھی ایسی جانچ مہمیں جاری رہیں گی۔
ترجمان نے تمام ہسپتال عملے سے اپیل کی کہ وہ ایسے اقدامات میں تعاون کریں اور کمیونٹی کی وسیع تر حفاظت کیلئے سیکورٹی ہدیات پر عمل کریں۔ایجنسیز