پٹنہ، 20 نومبر (یواین آئی) بہار کی راجدھانی پٹنہ میں جمعرات کو جوش، توانائی اور امیدوں سے بھرے دن کے دوران ریاست کی نو منتخب قومی جمہوری اتحاد گٹھ بندھن (این ڈی اے ) حکومت کی حلف برداری تقریب میں لوگوں کا جوش قابل دید تھا۔ اسٹیج سے بج رہے انتخابی لوک گیت ‘جوڑی مودی اور نتیش جی کے ہٹ ہو گئیل’ نے ماحول کو اور بھی رنگین بنا دیا۔ دھن شروع ہوتے ہی تقریب گاہ تالیوں اور نعروں سے گونج اٹھی۔
تقریب میں پہنچے ارول کے رام گووند سنگھ نے اس بھاری اکثریت کو وزیراعظم نریندر مودی کی مقبولیت کا نتیجہ بتایا۔ ان کے مطابق، "مودی جی کی قیادت اور ان کی کارگزاری ہی نے بہار میں یہ بڑا مینڈیٹ دلایا ہے ۔”
دوسری طرف نالندہ کے آلوک مہتوکا ماننا تھا کہ نتیش کمار کی صاف شبیہ اور طویل حکمرانی کا بھروسہ جیت کی بڑی وجہ بنا ہے ۔
دونوں کے درمیان جاری بحث کو سارن سے آئی طالبہ ریکھا کماری نے آسان الفاظ میں ختم کر دیا۔ اس نے کہا، "یہ جیت کسی ایک کی نہیں، بلکہ مشترکہ جیت ہے ۔ این ڈی اے کی جیت ہے اور عوام کی جیت ہے ۔ یہ گانا بھی یہی کہہ رہا ہے کہ مودی اور نتیش کی جوڑی ہی اس بار فاتح رہی ہے ۔”
اسی بحث کے درمیان اچانک آسمان میں تیز گرج سنائی دی۔ لوگوں کی توجہ اسٹیج سے ہٹ کر اوپر کی جانب ہو گئی۔ وزیراعظم نریندر مودی کا ہیلی کاپٹر تقریب گاہ کے اوپر چکر لگاتے ہوئے دہلی کی طرف روانہ ہو رہا تھا۔ بھیڑ کے بیچ سے ایک سرمیں نعرہ بلند ہوا "یہ ایک شاندار فتح کی گونج ہے ”
لوگوں نے ہاتھ ہلا کر وزیراعظم کا خیر مقدم کیا۔ کئی لوگ اس تاریخی لمحے کو اپنے موبائل میں قید کرتے بھی نظر آئے ۔
پورا پنڈال جوش، امید اور جشن میں ڈوبا رہا۔ حمایتیوں کا جذبہ اس بات کا اشارہ تھا کہ بہار میں نئی حکومت سے عوام بڑی توقعات رکھتی ہے ۔ پٹنہ کی یہ حلف برداری تقریب این ڈی اے کی جیت، قیادت کی قبولیت اور عوام کی شمولیت کی علامت بن گئی ہے ۔
گیت کی دھن سے لے کر ہیلی کاپٹر کی پرواز تک ہر منظر یہ پیغام دیتا رہا کہ بہار میں نئی حکومت کا سفر بھاری عوامی حمایت اور توانائی کے ساتھ شروع ہو چکا ہے ۔
