اسلام آباد، 15 نومبر (یواین آئی) پاکستانی ٹیم کے سابق کپتان بابر اعظم نے بالآخر 807 دنوں کی خاموشی توڑتے ہوئے سنچری بنا ڈالی، جس سے ان کی فارم پر اٹھنے والے سوالات کا خاتمہ ہوگیا اور ان کے مداحوں میں نئی خوشی دوڑ گئی۔بین الاقوامی کرکٹ کی مسلسل 83 اننگز تک سنچری نہ بنانے کے بعد بابر اعظم نے سری لنکا کے خلاف دوسرے ایک روزہ میچ میں شاندار بیٹنگ کرتے ہوئے 102 رنز کی بھرپور اننگز کھیلی۔ ان کی یہ سنچری نہ صرف پاکستان کے لئے اہم ثابت ہوئی بلکہ ان کے مداحوں کے لیے بھی بڑی خوشخبری تھی، جو طویل عرصے سے ان کے بڑے اسکور کا انتظار کر رہے تھے۔
اپنی اس شاندار کارکردگی کے بعد بابر اعظم نے فوٹوز اینڈ ویڈیوز شیئرنگ پلیٹ فارم انسٹاگرام پر میچ کی چند تصاویر شیئر کیں۔ واضح رہے کہ بابراعظم کی شاندار سنچری کے ساتھ پاکستان سے سری لنکا کو دوسرے ون ڈے میں 8 وکٹوں سے ہرا دیا، 289 رنز کا ہدف پاکستان نے دس گیندیں پہلے حاصل کر لیا۔
بابر اعظم نے 8 چوکوں کی مدد سے 102 رنز بنائے، اس سنچری کے لیے انہوں نے 2 سال 2 ماہ سے زیادہ عرصہ صبر کیا۔
سنچری بنانے کے بعد بابر اعظم نے پہلے ڈریسنگ روم اور پھر آسمان کی طرف دیکھا اور پھر سجدہ کیا۔
ناظرین نے ہر اسٹروک پر انہیں جی بھر کر داد دی، جب انہوں نے سنچری بنائی تو پورے اسٹیڈیم نے انہیں کھڑے ہو کر داد دی۔ آخر میں وننگ اسٹروک بھی بابراعظم ہی کے حصے میں آیا۔
میچ کے بعد بابر اعظم نے کہا کہ مداحوں کی سپورٹ سے بہت حوصلہ ملا، جو ہدف تھا اس کے مطابق بیٹنگ کی، سنچری اسکور کرنے کے بعد اعتماد بحال ہوا ہے۔ خود پر بھروسہ تھا کہ سنچری اسکور کرنی ہے۔
