کرناٹک میں قانون و انتظام برا حال:بی جے پی

نئی دہلی، 10 نومبر (یو این آئی) بھارتیہ جنتا پارٹی (بی جے پی) نے پیر کے روز کانگریس کی کرناٹک حکومت پر الزام لگایا کہ ریاست میں قانون و انتظام کی صورتحال انتہائی خراب ہو چکی ہے اور حکومت مجرموں کو جیل کے اندر اور باہر تحفظ فراہم کر رہی ہے ۔
بی جے پی ترجمان شہزاد پوناوالا نے پارٹی ہیڈکوارٹر میں منعقدہ پریس کانفرنس میں الزام عائد کیا کہ ”کرناٹک میں اقتدار کی لڑائی کے دوران قانون و انتظام تباہ ہو چکا ہے ، مجرموں میں قانون کا خوف نہیں رہا، عصمت داری اور قتل کے واقعات عام ہو گئے ہیں۔” انہوں نے کہا کہ ریاستی حکومت جیل میں بند دہشت گردوں، عصمت دری کے مجرموں، قاتلوں کو آرام و آسائش کے ساتھ عیاشی کا ساز و سامان فراہم کر رہی ہے ۔
شہزاد پوناوالا نے کہا کہ ”ایک طرف وزیراعظم مودی کی قیادت میں مرکزی حکومت جموں و کشمیر سے فرید آباد تک، ملک کی سلامتی ایجنسیاں اور حکومت سنجیدگی اور چوکسی کے ساتھ دہشت گردی کی کسی بھی ممکنہ واردات کو ہونے سے پہلے ہی ناکام بنا رہی ہیں۔” جبکہ دوسری طرف کانگریس کی حکومت والے کرناٹک میں اسلامی ٹیرر پلاٹ کا پردہ فاش ہوا ہے ۔
انہوں نے کانگریس پارٹی پر ”اسلامی جہادی دہشت” کے حوالے سے نرم رویہ رکھنے کا الزام لگاتے ہوئے کہا کہ کرناٹک حکومت جیل میں بند ایک اسلامی جہادی دہشت گرد کو وی وی آئی پی ٹریٹمنٹ دے رہی ہے ۔ ان کا کہنا تھا کہ ”جب مرکز دہشت گردی کے خلاف سخت ایکشن لے رہا ہے اور شہریوں کو دہشت گردوں کے ناپاک عزائم سے بچا رہا ہے ، وہیں کانگریس حکومت کرناٹک میں پکڑے گئے دہشت گرد کے لیے جلسے کا انعقاد کر رہی ہے ۔”