سرینگر/۱۶ مارچ
مرکزی وزیر داخلہ امیت شاہ ۱۸ مارچ سے جموں کے دو روزہ دورے پر آرہے ہیں۔شاہ ‘ لیفٹیننٹ گورنر منوج سنہا کے ساتھ جموں و کشمیر میں سیکورٹی کی صورتحال اور ترقیاتی کاموں کا اعلیٰ جائزہ لیں گے۔
نظرثانی شدہ شیڈول کے مطابق وزیر داخلہ۱۸ مارچ کی دوپہر کو جموں پہنچیں گے اور۱۹ مارچ کو یہاں ایم اے اسٹیڈیم میں سی آر پی ایف کے یوم تاسیس پریڈ سے خطاب کریں گے جس کے بعد سیکورٹی جائزہ میٹنگ ہوگی۔ وہ ۱۹ مارچ کی شام کو مرکزی دارالحکومت واپس آئیں گے۔
ایک میڈیا رپورٹ کے مطابق تمام نیم فوجی دستوں، انٹیلی جنس ایجنسیوں، جموں و کشمیر پولیس اور سول انتظامیہ کے اعلیٰ حکام سیکورٹی جائزہ اجلاس میں شرکت کریں گے جو کہ پانچ ماہ سے بھی کم عرصے میں مرکزی زیر انتظام علاقے میں وزیر داخلہ کی دوسری میٹنگ ہوگی۔
شاہ نے گزشتہ سال ۲۳ سے۲۷؍ اکتوبر تک پانچ دنوں کے لیے جموں و کشمیر کا دورہ کیا تھا اور کشمیر میں سیکورٹی صورتحال، ترقیاتی کاموں وغیرہ کا جائزہ لیا تھا اور جموں میں ایک ریلی سے خطاب کیا تھا۔
رپورٹ کے مطابق شاہ۱۸مارچ کو سی آر پی ایف کے ۸۳ویں یوم تاسیس کی تقریب میں بھی شرکت کریں گے ۔