اشٹر پرتھم’ نعرہ نہیں بلکہ ملک سے محبت کا جذبہ ہے : باگڈے

جے پور، 24 ستمبر (یو این آئی): راجستھان کے گورنر ہری بھاؤ کسن راؤ باگڈے نے کہا ہے کہ قوم کو سب سے مقدم رکھتے ہوئے سب کو مل کر کام کرنے کی ضرورت ہے ۔ ”راشٹر پرتھم” کوئی نعرہ نہیں بلکہ ملک سے محبت کا جذبہ اور سوچ ہے ۔
مسٹر باگڈے بدھ کے روز ”وِکسِت بھارت سنکلپ سَمیلن” میں ”راشٹر پرتھم” بین الاقوامی سمپوزیم سے خطاب کر رہے تھے ۔ انہوں نے کہا کہ امریکہ ہندوستان پر دباؤ ڈالنے کے لیے مسلسل حربے اپنا رہا ہے ، لیکن اس کے پاس اپنی صلاحیتیں نہیں ہیں۔ وہاں جو بھی باصلاحیت لوگ کام کرتے ہیں ان میں 70 سے 80 فیصد ہندوستانی ہیں۔ انہوں نے کہا کہ سابق وزیر اعظم اٹل بہاری واجپئی کی قیادت میں ملک میں جوہری تجربہ ہوا۔ جب پاکستان نے ہندودستان کو دھمکی دی تھی تو واجپئی نے کہا تھا کہ اگر پاکستان ہمارے ملک کے ایک چوتھائی حصے کو بھی نقصان پہنچائے گا تو پاکستان اگلے دن کا سورج نہیں دیکھ پائے گا، یہی ”راشٹر پرتھم” کی سوچ ہے ۔
انہوں نے کہا کہ ”راشٹر پرتھم” کی روح یہی ہے کہ وزیر اعظم نریندر مودی کی قیادت میں تیزی سے بڑے فیصلے ہو رہے ہیں۔ ملک میں 25 کروڑ لوگوں کے جن دھن کھاتے کھولے گئے ، جو دنیا میں کہیں نہیں ہوا۔ آزادی کے 47 سال بعد کشمیر کے لال چوک پر ترنگا لہرایا گیا، یہ بھی ”راشٹر پرتھم” کی مثال ہے ۔ ہمارا ملک تیزی سے وکست بھارت بن رہا ہے ۔ انہوں نے ترقیاتی اعداد و شمار بیان کرتے ہوئے کہا کہ آج ہندوستان دودھ کی پیداوار میں پہلے ، گندم کی پیداوار میں دوسرے نمبر پر ہے اور معیشت گیارہویں سے چوتھے نمبر پر آ گئی ہے ۔ یہی ”راشٹر پرتھم” کی سوچ ہے ۔
انہوں نے کہا کہ ملک کی آبادی کے تحت 280 کروڑ لوگوں کو ملک کی ترقی کے لیے کام کرنا چاہیے ۔ مسٹر باگڈے نے اس موقع پر لوک ماتا اہلیابائی ہولکر کو معنون ایک کتاب "کرم گاتھا ‘کا اجرا کیا ۔
اسمبلی اسپیکر واسودیو دیونانی نے کہا کہ قوم بذات خود ایک فکر اور زندہ فلسفہ ہے ۔ انہوں نے ”راشٹر پرتھم” کے تحت ہندوستانی مصنوعات کے استعمال کی اپیل کی اور سب کو اپنی ذمہ داریاں ادا کرنے اور قوم کوسب سے مقدم رکھتے ہوئے کام کرنے پر زور دیا۔ انہوں نے نصاب اور اساتذہ میں قومی جذبے کو پروان چڑھانے اور نئی نسل میں تہذیبی و اخلاقی تربیت کی ضرورت پر بھی زور دیا۔
انہوں نے کہا کہ ملک میں حاصل کی گئی تعلیم کا فائدہ بھی ملک ہی کے لیے ہونا چاہیے ۔ ہندوستان تیزی سے ترقی کی طرف بڑھ رہا ہے ، لیکن ترقی یافتہ ممالک نہیں چاہتے کہ ہندوستان آگے بڑھے ۔ انہوں نے کہا کہ سب کو مل کر ہند وستان کی ہمہ گیر ترقی کے لیے کام کرنا ہوگا۔