راہل ملک میں بنگلہ دیش اور نیپال جیسے حالات پیدا کرنا چاہتے ہیں: بی جے پی

نئی دہلی، 18 ستمبر (یو این آئی) بھارتیہ جنتا پارٹی (بی جے پی) نے جمعرات کو کہا کہ آئینی اداروں اور جمہوریت پر حملہ کرکے کانگریس لیڈر راہل گاندھی ملک میں عدم استحکام پیدا کرکے بنگلہ دیش اور نیپال جیسی صورتحال پیدا کرنا چاہتے ہیں۔
پارٹی ہیڈکوارٹر میں بی جے پی لیڈر انوراگ ٹھاکر نے مسٹر گاندھی پر الزام لگاتے ہوئے کہا کہ 90 انتخابات ہارنے کے بعد کانگریس اور ان کے سرکردہ لیڈر مایوس ہیں، جس کی وجہ سے مسٹر گاندھی کو اب بے بنیاد الزامات لگانے کی عادت بن گئی ہے ۔
مسٹر ٹھاکر نے کہا کہ مسٹر گاندھی کا الیکشن کمیشن کے خلاف تازہ ترین الزام "ہائیڈروجن بم کے بجائے پھلجھڑی” ثابت ہوا ہے کیونکہ کمیشن نے کہا ہے کہ کسی کا ووٹ آن لائن منسوخ نہیں کیا جا سکتا۔
انہوں نے کہا کہ مسٹر گاندھی سے جب لگائے گئے الزامات کو ثابت کرنے کے لئے کہا جاتا ہے تو وہ پیچھے ہٹ جاتے ہیں، جب حلف نامہ دینے کو کہا جاتا ہے تو وہ انکار کر دیتے ہیں۔ بے بنیاد الزامات لگانا ان کی عادت بن چکی ہے ۔
مسٹر گاندھی پر الزام لگاتے ہوئے بی جے پی لیڈر نے کہا کہ آئینی اداروں اور الیکشن کمیشن پر بار بار جھوٹے اور بے بنیاد الزامات لگانا، کبھی وی وی پیٹ، کبھی ای وی ایم، کبھی انتخابی نتائج ، کبھی ٹول کٹ کی مدد سے ہندوستان کے آئینی اداروں کی ساکھ پر سوال اٹھانا ان کی عادت بن گئی ہے ۔