برازیل کے سابق صدر بولسونارو کینسر کے علاج کے بعد اسپتال سے رخصت

براسیلیا، 18 ستمبر (یو این آئی) برازیل کے سابق صدر جئیر بولسونارو کو بدھ کے روز اسپتال سے رخصت کردیا گیا ہے جہاں جلد کے کینسر کی تشخیص کے بعد ان کاعلاج کیا جا رہا تھا۔ یہ بات براسیلیا کے ڈی ایف اسٹار اسپتال کے ذرائع نے بتائی۔
اسپتال کے مطابق، بولسونارو کی حالت میں انٹراوینس انفیوژن علاج کے بعد بہتری آئی ہے ، تاہم انہیں اب بھی طبی نگرانی اور باقاعدہ معائنے کی ضرورت ہے ۔ اسپتال نے ان کے جسم سے ہٹائے گئے جلدی زخموں کا پیتھو لوجیکل ٹیسٹ کیا۔ طبی رپورٹ میں بتایا گیا کہ ہٹائے گئے آٹھ زخموں میں سے دو میں ”اسکواومس سیل کارسینوما اِن سِٹو” موجود ہیں۔
بولسونارو بدھ کی دوپہر کو اپنے گھر واپس آگئے جہاں وہ دوبارہ نظر بندی میں ہیں۔
خیال رہے کہ سابق صدر کو منگل کے روز قے ، چکر آنے اور بلڈ پریشر کم ہو جانے کی شکایات پر اسپتال میں داخل کیا گیا تھا۔
یاد رہے کہ 11 ستمبر کو برازیل کی سپریم فیڈرل کورٹ نے سابق صدر کو 2022 میں بغاوت کی کوشش کے جرم میں 27 سال اور 3 ماہ قید کی سزا سنائی تھی۔4 اگست کو بغاوت کی سازش میں ان کی مبینہ شمولیت کے بارے میں کی جانے والی تحقیقات میں سابقہ قانونی پابندیوں کی حکم عدولی پر عدالت نے گھر میں نظر بندی کا فیصلہ سنایا تھا