اسپتال میں چوہے کے کاٹنے سے نوزائیدہ بچوں کی موت شرمناک: راہل گاندھی

نئی دہلی، 04 ستمبر (یو این آئی) کانگریس کے سابق صدر اور لوک سبھا میں اپوزیشن لیڈر راہل گاندھی نے مدھیہ پردیش کے اندور میں ریاست کے سب سے بڑے سرکاری اسپتال میں چوہے کے کاٹنے سے دو نوزائیدہ بچوں کی موت کو شرمناک قرار دیتے ہوئے کہا ہے کہ اسپتالوں کی نجکاری کرکے بی جے پی حکومت غریبوں کا علاج مشکل بنا رہی ہے ۔
مسٹر راہل گاندھی نے جمعرات کے روز سوشل میڈیا پر ایک پوسٹ میں کہا، "مدھیہ پردیش میں اندور کے سب سے بڑے سرکاری اسپتال میں چوہوں کے کاٹنے سے دو نوزائیدہ بچوں کی موت ہوگئی – یہ کوئی حادثہ نہیں ہے ، یہ قتل ہے ۔ یہ واقعہ اتنا بھیانک، غیر انسانی اور بے حسی کا نتیجہ ہے کہ سن کر بھی روح کانپ جاتی ہے ۔ ایک ماں نے اپنے بچے کو اپنی گود سے کھو دیا، کیونکہ حکومت نے اپنی بنیادی ذمہ داری پوری نہیں کی۔”
انہوں نے کہا کہ بی جے پی حکومت نے جان بوجھ کر صحت کے شعبے کو پرائیویٹ ہاتھوں میں دے دیا – جہاں علاج اب صرف امیروں کے لیے ہے ، غریبوں کے لیے سرکاری اسپتال موت کے مراکز بن گئے ہیں، زندگی بچانے والے نہیں۔ انتظامیہ ہمیشہ کی طرح کہتی ہے – ‘تفتیش ہوگی’ لیکن سوال یہ ہے کہ جب آپ نوزائیدہ بچے کی حفاظت بھی نہیں کر سکتے تو پھر آپ کو حکومت چلانے کا کیا حق ہے ؟
مسٹر راہل گاندھی نے کہا کہ اس واقعہ کے بعد وزیر اعظم نریندر مودی اور مدھیہ پردیش کے وزیر اعلی موہن یادو کو شرم سے سر جھکا لینا چاہیے ۔ آپ کی حکومت نے ملک کے کروڑوں غریبوں سے صحت کا حق چھین لیا ہے اور اب ماں کی گود سے بچہ بھی چھیننا شروع کر دیا ہے ۔
انہوں نے کہا "مودی جی، یہ آواز ان لاکھوں والدین کی جانب سے اٹھائی جا رہی ہے جو آج حکومت کی لاپرواہی کا شکار ہو رہے ہیں، آپ انہیں کیا جواب دیں گے ؟ ہم خاموش نہیں رہیں گے ۔ یہ لڑائی ہر غریب، ہر خاندان، ہر بچے کے حقوق کی ہے ۔”