ووٹروں کے حقوق کی لڑائی کو آگے بڑھانا ہوگا: کھرگے

نئی دہلی 25 اگست (یواین آئی) کانگریس کے صدر ملکارجن کھرگے نے پیر کو کہا کہ بہار میں انڈیا اتحاد کی جاری ووٹر ادھیکاریاترا کو عوام کی بھرپور حمایت مل رہی ہے اور ہمیں ووٹروں کے حقوق کے لیے اپنی لڑائی کو آگے بڑھانا ہے ۔
مسٹر کھرگے نے یہاں کانگریس تنظیم سازی پروگرام کے تحت جھارکھنڈ، اڈیشہ، پنجاب اور اتراکھنڈ کے پارٹی مبصرین کی میٹنگ میں کہا کہ پارٹی کو رائے دہندوں کے حقوق کے لیے اپنی لڑائی کو آگے بڑھانا ہے اور ساتھ ہی لوگوں کو پیغام بھی دینا ہے ۔
انہوں نے کہا کہ کانگریس کی تنظیم میں ضلع صدر کی بڑی اہمیت ہے ۔ سابق وزیر اعظم لال بہادر شاستری، سابق وزیر اعلیٰ گووند ولبھ پنت، سابق وزیر اعلیٰ گنڈو راؤ، وزیر دھرم سنگھ ضلع صدر کے عہدے پر فائز رہ چکے ہیں۔ وہ خود وزیر رہتے ہوئے ضلع صدر بن گئے ۔ انہوں نے کہا کہ پارٹی میں خواتین کی قیادت کو بڑھانا ہو گا، انہیں ذمہ داری دے کر قومی دھارے میں لانا ہو گا۔
کانگریس صدر نے پارٹی کے ان مبصرین کو ہدایت دی کہ وہ 2 سے 14 ستمبر تک اپنی اپنی ریاستوں کا دورہ کریں اور پارٹی کے نئے ضلع صدور کے ناموں کے حوالے سے رپورٹ پیش کریں۔ انہوں نے کہا کہ 8 ستمبر کو جائزہ اجلاس منعقد ہوگا جس کے بعد نئے ضلعی صدور کا اعلان کیا جائے گا۔