یانگون//
میانمار کی کیین ریاست کے دارالحکومت ھپا-آن میں سیلاب کے باعث 10,395افراد کو 24 عارضی امدادی کیمپوں میں منتقل کیا گیا ہے۔
یہ معلومات سرکاری میانمار ریڈیو اور ٹیلی ویژن نے بدھ کی شب فراہم کیں۔
رپورٹ کے مطابق موسلا دھار بارش کے بعد تھانلِون ندی کی سطح خطرے کے نشان سے اوپر چلی گئی، جس کے بعد گزشتہ روز ڈزاسٹر مینجمنٹ کمیٹیوں کے ارکان، فائر فائٹرز، میانمار ریڈ کراس سوسائٹی اور کمیونٹی پر مبنی تنظیموں نے متاثرین کو امدادی کیمپوں میں منتقل کیا۔
محکمہ موسمیات کے مطابق جمعرات کو ھپا-آن میں ندی کی سطح خطرے کے نشان سے تقریباً چھ فٹ بلند ہو گئی ہے اور امکان ہے کہ آئندہ ایک روز تک یہ سطح برقرار رہے گی۔ رپورٹ میں مزید بتایا گیا ہے کہ کیین ریاستی حکومت عطیہ دہندگان کے تعاون سے خوراک کی فراہمی میں مصروف ہے،جبکہ وزارتِ صحت کی جانب سے طبی سہولیات اور علاج مہیا کیا جا رہا ہے۔
