ایجنسیز
دراس//
مرکزی وزیر منسکھ مانڈویا نے ہفتے کے روز لداخ کے دراس میں سینکڑوں نوجوانوں کے ہمراہ پدیاترا (پیدل مارچ) کی قیادت کی تاکہ ۱۹۹۹کی کرگل جنگ میں شہید ہونے والے فوجی جوانوں کو خراج عقیدت پیش کیا جا سکے۔
اس موقع پر مرکزی وزیر مملکت برائے دفاع سانجے سیٹھ اور لداخ خود مختار پہاڑی ترقیاتی کونسل (ایل اے ایچ ڈی سی) کرگل کے چیئرمین محمد جعفر اخون بھی ان کے ہمراہ تھے۔
نوجوانوں کے امور اور کھیلوں کے مرکزی وزیر منسکھ مانڈویا نے شرکاء پر زور دیا کہ وہ’پہلے قوم‘ کے جذبے کے تحت ایک مضبوط اور ترقی یافتہ بھارت کی تعمیر کے لیے خود کو وقف کریں۔
انہوں نے کہا’’ہم ہمیشہ فتح مند رہے ہیں، فتح مند ہونا ہماری فطرت ہے‘‘۔
مرکزی وزیر نے مزید کہا کہ اس پدیاترا کے ذریعے ہم ملک بھر کے نوجوانوں کو یہ پیغام دینا چاہتے ہیں کہ ہم سب اپنے ملک کے تئیں اپنے فرائض اور ذمہ داریوں کو پورا کرنے کا عہد کریں۔
مرکزی وزیر مملکت سانجے سیٹھ نے اجتماع سے خطاب کرتے ہوئے نوجوانوں کی توانائی اور مسلح افواج کی قربانیوں کی بھرپور تعریف کی۔
