نئے فوجداری قوانین کا مقصد انصاف اور شفافیت کو یقینی بنانا ہے :امتیازحسین

سرینگر//
سینئر سپرنٹنڈنٹ آف پولیس (ایس ایس پی) سرینگر‘ امتیاز حسین نے نئے فوجداری قوانین کے متعلق عوامی جانکاری کی اہمیت کو اجاگر کرتے ہوئے کہا ہے کہ ان کا مقصد انصاف اور شفافیت کو یقینی بنایا ہے ۔
حسین نے کہا کہ تعزیرات ہند سے انڈین جسٹس کوڈ میں تبدیلی سزا سے انصاف کی طرف منتقلی کی نشاندہی کرتی ہے ۔
ایس ایس پی نے ان باتوں کا اظہار جمعرات کو یہاں نئے فوجداری قوانین پر منعقدہ ایک پروگرام کے حاشیہ پر نامہ نگاروں کے ساتھ بات کرنے کے دوران کیا۔
حسین نے کہا’’ہمارا مقصد لوگوں تک نئے فوجداری قوانین کے متعلق جانکاری پہنچانا ہے اور حکومت قانونی نظام کو مزید شفاف، جوابدہ، اور شہریوں پر مرکوز بنانے کیلئے پر عزم ہے‘‘۔
ان کا کہنا تھا’’پہلے یہاں انڈین پینل کوڈ تھا جو اب بھارتیہ نیائے کوڈ میں تبدیل ہوا ہے ، پینل کا معنی سزا ہے جبکہ نیائے کے معنی انصاف ہے‘‘۔انہوں نے کہا کہ تعزیرات ہند سے انڈین جسٹس کوڈ میں تبدیلی سزا سے انصاف کی طرف منتقلی کی نشاندہی کرتی ہے ۔
حسین نے کہا کہ یہ تبدیلی نوآبادیاتی قانونی فریم ورک سے جمہوری اور خودمختار نظام کی طرف ہمارے سفر کی عکاسی کرتی ہے ۔انہوں نے کہا’’یہ نئے قوانین انصاف پر منحصر ہیں تاکہ لوگوں کو صحیح معنوں میں انصاف ملے ‘‘۔
ایس ایس پی کا کہنا تھا’’ہماری توجہ نہ صرف تعزیری کارروائی پر بلکہ انصاف پر ہے اور اس بات کو یقینی بنانا کہ لوگ اپنے حقوق اور ذمہ داریوں کو سمجھیں‘‘۔انہوں نے کہا کہ نئے فوجداری قوانین کے متعلق آگے بھی جانکاری پروگرام جاری رہیں گے ۔