وزیر اعظم مودی ۱۷ فروری کو کٹرا سے کشمیر کیلئے ٹرین کو ہری جھنڈی دکھائیں گے

سرینگر//
وزیر اعظم نریندر مودی۱۷فروری کو اودھم پور سرینگر بارہمولہ ریل لنک (یو ایس بی آر ایل) پروجیکٹ کی تکمیل میں ایک اہم سنگ میل کی حیثیت رکھتے ہوئے کشمیر کے لئے ٹرین کا افتتاح کرنے والے ہیں۔
ایک عہدیدار نے بتایا کہ وزیر اعظم جموں ڈویڑن سے خصوصی طور پر تیار کردہ وندے بھارت ایکسپریس کو ہری جھنڈی دکھائیں گے۔
انہوں نے کہا کہ برسوں کی لگن، انجینئرنگ کی ذہانت اور انتھک کوششوں کے بعد کشمیر کے ریل رابطے کا دیرینہ خواب بالآخر پورا ہوا ہے۔ وندے بھارت ایکسپریس جلد ہی اس تاریخی روٹ پر چلے گی۔
یو ایس بی آر ایل پروجیکٹ کے ایک حصے کے طور پر ، ہندوستانی ریلوے نے ملک کے کچھ مشہور پلوں کو عبور کرتے ہوئے متعدد کامیاب آزمائشی رن کیے ہیں۔
۳۳۱میٹر اونچے پل کے ساتھ انجی کھڈ برج انجینئرنگ کا ایک قابل ذکر کارنامہ ہے جبکہ۳۵۹ میٹر کی بلندی پر چناب پل دنیا کا بلند ترین ریلوے پل ہونے کا اعزاز رکھتا ہے۔ یہ پل نہ صرف علاقائی رابطے کو بڑھاتے ہیں بلکہ ہندوستان کی تکنیکی اور بنیادی ڈھانچے کی طاقت کو بھی ظاہر کرتے ہیں۔
افسر نے کہا’’اس ٹرین کو خاص طور پر کٹرا،سرینگر ریل روٹ پر جموں و کشمیر کے سخت سردی کے حالات میں مؤثر طریقے سے چلانے کے لئے ڈیزائن کیا گیا ہے‘‘۔انہوں نے مزید کہا’’اس میں آب و ہوا کے خلاف مزاحمت کرنے والی جدید ٹکنالوجی شامل ہے، جس میں ہیٹنگ سسٹم بھی شامل ہے جو پانی اور بائیو ٹوائلٹ ٹینکوں کو منجمد ہونے سے روکتا ہے‘‘۔
مزید برآں، انہوں نے کہا کہ ایئر بریک سسٹم کو صفر سے کم درجہ حرارت میں بھی ہموار آپریشن کیلئے بہتر بنایا گیا ہے۔
افسر نے کہا’’وندے بھارت ایکسپریس میں ونڈ شیڈ میں ہیٹنگ عناصر بھی شامل ہیں تاکہ ڈرائیور کے فرنٹ لک آؤٹ شیشے کو خود بخود ڈیفرسٹ کیا جا سکے، جس سے سخت سردی کے حالات میں واضح نظارت کو یقینی بنایا جا سکے، ان خصوصی تبدیلیوں کے علاوہ، ٹرین تمام معیاری وندے بھارت سہولیات پیش کرتی ہے، جیسے مکمل ایئر کنڈیشنڈ کوچ، آٹومیٹک پلگ ڈور، موبائل چارجنگ ساکٹ وغیرہ۔‘‘
وندے بھارت ٹرین دہلی سے سرینگر تک کے۸سو کلومیٹر فاصلے کو صرف ۱۳گھنٹوں میں طے کرے گی۔یہ ٹرین شری ماتا ویشنو دیوی کٹرا سے سرینگر کے درمیان۱۹۰کلو میٹر کے فاصلے کو محض۳ گھنٹوں میں طے کرے گی اور اس دوران یہ ٹرین بعض اہم اسٹیشنوں پر رکے گی۔
حکام کا کہنا ہے کہ وادی کشمیر کو قومی ریلوے نیٹ ورک سے جوڑ کر یہ ٹرین پر عالمی معیار کا سفری تجربہ ہے ۔انہوں نے کہا کہ یہ پروجیکٹ جغرافیائی اور اقتصادی خلا کو ختم کرنے کے لیے ہندوستان کے عزم کو واضح کرتی ہے ۔
شری ماتا ویشنو دیوی کٹرا کو دہلی سے جوڑنے والے دو کامیاب راستوں کے بعد شمالی ریلوے زون کے ذریعے چلائی جانے والی یہ خطے کے لیے تیسری وندے بھارت ٹرین ہے ۔
قابل ذکر ہے کہ ریلوے نے ۲۷۲کلو یٹروں پر محیط اودھم پور، سری نگر، بارہمولہ ریل لنک (یو ایس بی آر ایل) پروجیکٹ کو مکمل کیا ہے ۔