بارش سے متاثرہ ٹی ٹوئنٹی میں آسٹریلیا نے پاکستان کو 29 رن سے شکست دی

برسبین//) گلین میکسویل (43) اور مارکس اسٹونیس (ناٹ آؤٹ 21) کی شاندار بلے بازی کے بعد آسٹریلیا نے زیویئر بارٹلیٹ اور نیتھن ایلس (تین- تین وکٹ) کی عمدہ گیند بازی کی بدولت بارش سے متاثرہ پہلے ٹی 20 میچ میں پاکستان کو 29 رنز سے شکست دی۔ اس کے ساتھ ہی آسٹریلیا نے تین میچوں کی سیریز میں 1-0 کی برتری حاصل کر لی ہے۔ گلین میکسویل کو ان کی طوفانی بلے بازی پر پلیئر آف دی میچ کا ایوارڈ دیا گیا۔
کپتان محمد رضوان نے بارش سے متاثرہ (7 اوورز فی اننگز) میچ میں ٹاس جیت پہلے فیلڈنگ کا فیصلہ کیا جو درست ثابت نہ ہوا۔
آسٹریلیا نے محدود اوورز کے میچ میں پہلے بیٹنگ کرتے ہوئے پاکستان کو جیت کے لیے 94 رنز کا ہدف دیا جس کے جواب میں پاکستان ٹیم مقررہ اوورز میں 9 وکٹوں کے نقصان پر صرف 64 رنز بنا سکی۔
پاکستان کی جانب سے کپتان محمد رضوان اور صاحبزادہ فرحان نے اننگز کا آغاز کیا تاہم پہلے اوور کی پہلی دو گیندوں پر چوکے لگانے کے بعد صاحبزادہ فرحان فاسٹ باؤلر سپینسر جونسن کا شکار بنے، وہ 8 رنز بنا کر آؤٹ ہوئے۔
دوسرے اوور کی دوسری گیند پر ہی کپتان محمد رضوان بغیر کوئی رن بنائے آؤٹ ہوگئے، اس کے بعد وکٹ پر آنے والے اسٹار بیٹر بابر اعظم اور عثمان خان بھی زیادہ دیر بیٹنگ نہ کرسکے اور دونوں کھلاڑی بلترتیب 3 اور 4 رنز بنا کر پویلین لوٹ گئے، بابر اعظم نیتھن ایلس اور عثمان خان زیویئر بارٹلیٹ کا شکار بنے، یوں پاکستان کی آدھی ٹیم محض 16 رنز پر آؤٹ ہوگئی۔
نیتھن ایلس اور زیویئر بارٹلیٹ کی تباہ کن بولنگ کے سامنے پاکستانی ٹیم ریت کی دیوار نظر آئی اور وقفے وقفے سے وکٹیں گرنے کا سلسلہ جاری رہا، سلمان آغا 4، عرفان خان صفر، حسیب اللہ خان 12 رنز اسکور کر سکے جبکہ عباس آفریدی 20 رنز بنا کر نمایاں بلے باز رہے۔
کینگروز کی جانب سے نیتھن ایلس اور زیویئر بارٹلیٹ نے شاندار باؤلنگ کا مظاہرہ کرتے ہوئے 3، 3 کھلاڑیوں کو آؤٹ کیا، گلین میکسویل کو برق رفتار بلے بازی کرنے پر مین آف دی میچ کے ایوارڈ سے نوازا گیا۔
آسٹریلیا نے پہلے بیٹنگ کرتے ہوئے مقررہ 7 اوورز میں 4 وکٹ کے نقصان پر 93 رنز بنائے، کینگروز کی جانب سے ون ڈے سیریز میں ناکام رہنے والے گلین میکسویل نے 19 گیندوں پر 5 چوکوں اور 3 چھکوں کی مدد سے 43 رنز بنائے اور ٹیم کو ایک مستحکم ٹوٹل تک پہنچایا، ٹیم کے فاسٹ باؤلر عباس آفریدی 2 وکٹیں لے کر نمایاں رہے۔