’ہمارے ترقی کے ریکارڈ سے باقی گھبرا رہے ہیں‘

سرینگر//
پی ڈی پی کی صدر اور سابق وزیر اعلیٰ محبوبہ مفتی کا کہنا ہے کہ پی ڈی پی کے ترقی کے حوالے سے ریکارڈ سے باقی پارٹیاں گھبرا رہی ہیں۔
محبوبہ نے کہا کہ پی ڈی پی واحد وہ جماعت ہے جو جموں وکشمیر کے مسئلے کی بات کرتی ہے ۔
سابق وزیر اعلیٰ نے ان باتوں کا اظہار منگل کے روز جنوبی کشمیر کے ضلع پلوامہ میں نامہ نگاروں کے ساتھ بات کرنے کے دوران کیا۔
پی ڈی پی کی صدر نے کہا’’پی ڈی پی کا جو ترقی کا ریکارڈ ہے چاہے وہ راستے کھولنے کا ہو‘یونیورسٹیاں اور کالج قائم کرنے کا ہو‘ اے آئی آئی ایم قائم کرنے کا ہو، روزگار کے موقعے فراہم کرنے کا ہو، سے باقی پارٹیاں گبھرائی ہوئی ہیں‘‘۔
محبوبہ کا کہنا تھا’’باقی پارٹیوں کو لوگوں سے معافی مانگنے کے سوا کوئی چارہ نہیں ہے‘‘۔انہوں نے کہا’’پی ڈی پی وہ واحد پارٹی ہے جو جموں و کشمیر کے مسئلے کی بات کرتی ہے ‘‘۔
ایک سوال کے جواب میں انہوں نے کہا’’سالوں سے نوجوان جیلوں میں ہیں ان کے والدین کو ان سے ملنے نہیں دیا جا رہا ہے جبکہ دوسری طرف جیلوں سے لوگوں کو الیکشن کیلئے اٹھایا جا رہا ہے ان کو سیکورٹی دی جا رہی ہے ‘‘۔
محبوبہ کا کہنا تھا’’جب ان کے کارکن ہمارے امیدوار پر حملہ کرتے ہیں تو پولیس کارروائی نہیں کرتی ہے بلکہ الیکشن کمیشن کی طرف سے ہمارے امید وار کے نام نوٹس جاری کی جاتی ہے ۔‘‘
محبوبہ نے کہا کہ صرف ان کی پارٹی ہی مسئلہ کشمیر کے حل کی وکالت کرتی ہے اور جیلوں میں بند نوجوانوں کے بارے میں بات کرتی ہے۔
پی ڈی پی صدر نے جیل میں قید بارہمولہ کے رکن پارلیمنٹ انجینئر رشید کی عوامی اتحاد پارٹی (اے آئی پی) کو نشانہ بناتے ہوئے کہا کہ جیل میں ایک شخص الیکشن لڑ رہا ہے جبکہ ایک غریب شخص کے اہل خانہ کو جیل میں اپنے رشتہ داروں سے ملنے کی اجازت نہیں ہے۔