منڈیٹ کوئی مسئلہ نہیں بلکہ جیت ہی ہمارا مشن ہے :رینا

جموں//
جموںکشمیر بی جے پی یونٹ کے صدر رویندر رینا نے پیر کے روز کہاکہ کارکنوں اور لیڈران سے گفت وشنید کے بعد ہی امیدواروں کی پہلی لسٹ منظر عام پر لائی گئی ہے ۔
انہوں نے کہاکہ جموں وکشمیر اسمبلی انتخابات میں جیت بی جے پی کے لئے سب سے بڑا مشن ہے ۔
ان باتوں کا اظہار موصوف نے جموں میں نامہ نگاروں سے بات چیت کے دوران کیا۔
رینا نے کہا کہ اسمبلی چناؤ کو لے کر بی جے پی نے امیدواروں کی پہلی لسٹ منظرعام پر لائی ہے ، کارکنوں ، لیڈروں سے کئی دنوں تک تبادلہ خیال کرنے کے بعد ہائی کمانڈ نے ناموں کا اعلان کیا۔انہوں نے مزید بتایا کہ پہلے مرحلے پر بی جے پی نے۱۵؍امیدواروں کی لسٹ کو منظر عام پر لایا ہے ۔
رینا نے کہاکہ بی جے پی کے کارکنان اسمبلی انتخابات میں جیت کی خاطر دن رات کام کر رہے ہیں اور ہمارے لئے منڈیٹ کوئی مسئلہ نہیں ۔
بی جے پی یونٹ صدر کے مطابق ’’ہمارے لئے بی جے پی کی جیت ہی سب سے بڑا مشن ہے ‘‘۔انہوں نے کہا کہ اسمبلی انتخابات میں بی جے پی اچھی کارکردگی کا مظاہرہ کرکے حکومت تشکیل دینے میں کامیاب ہو جائے گی۔
ادھرجموںکشمیر کی گرمائی راجدھانی جموں میں بی جے پی صدر دفتر پر کارکنوں نے ہنگامہ کیا اور نعرے بازی کی۔
معلوم ہوا ہے کہ منڈیٹ نہ ملنے پر کئی بی جے پی لیڈران ناراض ہو گئے ہیں ۔
اطلاعات کے مطابق بی جے پی کی جانب سے آج امیدواروں کی پہلی لسٹ سامنے آنے کے ساتھ ہی ناراض کارکن اور لیڈران بھاجپا دفتر پر پہنچے اور وہاں پر ہنگامہ کیا۔
نامہ نگاروں سے بات چیت کے دوران کئی لیڈران نے بتایا کہ بی جے پی نے سینئر لیڈران کو ٹکٹ نہیں دی جو ناقابل برداشت ہے۔انہوں نے مزید بتایا کہ بی جے پی قیادت نے نئے چہروں کو منڈیٹ دیا جو ناانصافی کے مترادف ہے ۔
ان کا مزید کہنا تھا کہ اگر اس لسٹ کو منسوخ نہیں کیا گیا تو بی جے پی میں بھی بغاوت شروع ہو جائے گی۔ذرائع نے بتایا کہ بی جے پی کے سینئر لیڈران فوری طورپر جائے موقع پر پہنچے اور ناراض لیڈران کو منانے کی کوششیں جاری ہیں۔