سنہا کا یوم آزادی کی تقریبات کی تیاریوں کا جائزہ

سرینگر//
لیفٹیننٹ گورنر منوج سِنہا نے آج یوم آزادی کی تقریبات کی تیاریوں کا جائزہ لینے کیلئے ضلع ترقیاتی کمشنروں اور سول اور پولیس اِنتظامیہ کے سینئر افسران کے ساتھ ایک اعلی ٰسطحی میٹنگ کی صدارت کی۔
لیفٹیننٹ گورنر نے ضلع اِنتظامیہ اور متعلقہ محکموں کو ہدایت دی کہ وہ پورے جموںوکشمیر یوٹی میں یوم آزادی کی تقریبات کے احسن اِنعقاد کیلئے تمام ترانتظامات کو یقینی بنائیں۔
سنہا نے تمام شراکت داروں کے ساتھ مل کر کام کرنے کی اہمیت پر زور دیا تاکہ لوگوں کی فعال شرکت کو آسان بنایا جاسکے اور مجاہدین آزادی، گمنام ہیروز اور شہدأ کے اعزاز میں سرگرمیوں او رتقریبات کی باریک بینی سے منصوبہ بندی کی جائے ۔
لیفٹیننٹ گورنر نے یکم؍ اگست سے ۱۴؍اگست ۲۰۲۴ ء تک سوچھتا پکھواڑہ کے اِنعقاد کی ہدایت دی۔ اُنہوں نے متعلقہ محکموں کو ہدایت دع کہ وہ اہم عوامی مقامات اور یادگاروں پر ۱۵ روزہ مہم’’ ایک پیڑ شہیدوں کے نام’’ شرو ع کریں۔
سنہا نے کہا ’’درخت لگا کر شہیدوں کو خراجِ عقیدت پیش کرنے کی یہ مہم پورے جموںوکشمیر یوٹی میں ایک عوامی تحریک بن جانی چاہیے۔ اِس مہم کو کامیاب بنانے کے لئے ہر فرد اور زندگی کے مختلف شعبوں سے تعلق رکھنے والی ممتاز شخصیات کو اِکٹھاہونا چاہئے۔‘‘