حیدرآباد//حیدرآباد پولیس نے جی ایس ٹی کی رقم کی واپسی کی دھوکہ دہی کے 7معاملات میں ملوث جی ایس ٹی کے پانچ عہدیداروں کو گرفتار کرلیا۔ یہ دھوکہ دہی 46کروڑ روپے کی تھی۔ حیدرآباد سنٹرل کرائم اسٹیشن ڈیٹکٹیو ڈپارٹمنٹ نے کہاہے کہ اس نے ریاست کے مختلف سرکلس میں خدمات انجام دینے والے جی ایس ٹی کے عہدیداروں کو گرفتار کرلیا۔
یہ گرفتاری 7فرضی الکٹرک بائیک کی تیاری کرنے والی کمپنیوں کے خلاف سی سی ایس کی جانب سے درج کردہ مقدمات کے سلسلہ میں کی گئی ہے ۔ گرفتار شدگان میں پی سورنا کمار ڈپٹی کمشنر جی ایس ٹی نلگنڈہ، کے وینوگوپال اسسٹنٹ کمشنر اسٹیٹ ٹیکسس عابڈس سرکل، وشوا کرن اسسٹنٹ کمشنر اسٹیٹ ٹیکسس مادھا پور1 سرکل، وی وینکٹ رمنا ڈپٹی اسٹیٹ ٹیکس آفیسر جی ایس ٹی مادھا پور2سرکل اور ایم مہیتا سینئر اسسٹنٹ مادھاپور سرکل3 شامل ہیں۔ پولیس کے مطابق اِن عہدیداروں نے فرضی بائیک تیار کرنے والے یونٹس کے ساتھ سازش کی تھی۔ ملزمین نے حیدرآباد میں اِن کے مالکین سے برقی بلز کی وصولی کے ذریعہ فرضی کمپنیاں قائم کی تھیں۔ اس سلسلہ میں جی ایس ٹی پورٹل میں شکایت درج کروائی گئی تھی۔