شاہ سلمان اپنے معمول کے طبی معائنے کےبعد ہسپتال سے رخصت

الریاض//
خادم حرمین شریفین شاہ سلمان بن عبد العزیز جدہ میں کنگ فیصل اسپیشلسٹ ہسپتال میں معمول کےطبی معائنے کے بعد ہسپتال سے رخصت ہوگئے۔
قبل ازیں سعودی عرب کے شاہی دیوان کی طرف سے جاری ایک بیان میں کہا گیا تھا کہ شاہ سلمان معمول کے طبی معائنے کے لیے ہسپتال داخل ہوئے ہیں۔ وہاں چند گھنٹے تک ان کا معمول کا طبی معائنہ کیا گیا جس کے بعد وہ وہاں سے رخصت ہوگئے تھے۔
شاہ سلمان بن عبد العزیز نے گذشتہ روز جدہ میں کابینہ کے اجلاس کی صدارت کی تھی۔ اجلاس میں حائل کے علاقے ’طابہ‘ میں زمین پھٹنے سے متاثر ہونے والے خاندانوں کے لیے فی کنبہ دو لاکھ ریال یا متبادل اراضی فراہم کرنے کی منظوری دی گئی۔
کابینہ کے اجلاس کی صدارت شاہ سلمان بن عبد العزیز نے کی۔ اجلاس میں خطے اور دنیا میں سلامتی اور استحکام کے قیام کے لیے سعودی عرب کے قائم کردہ عزم کی تجدید کی۔ اجلاس میں فلسطینیوں کے خلاف اسرائیلی جارحیت کی روک تھام پر زور دینے کے ساتھ عالمی برادری پر زوردیا کہ وہ مشرقی بیت المقدس پر مشتمل 1967ء کی سرحدوں میں فلسطینی ریاست کے قیام کے لیے اپنی ذمہ داریاں پوری کرے اور غزہ میں خون خرابہ بند کرائے۔