یو اے ای میں تیز بارشوں کی پیشگوئی، ملازمین کو گھر سے کام اور اسکولز کو آن لائن کلاسز کی ہدایت

متحدہ عرب امارات//
متحدہ عرب امارات کی حکومت نے شدید بارشوں سے نمٹنے کیلئے اہم اقدامات اٹھائے ہیں۔
متحدہ عرب امارات میں آج اور کل 70 کلومیٹر فی گھنٹہ کی رفتار سے تیز ہواؤں کی پیشگوئی کی گئی ہے، اس دوران رہائشیوں کو احتیاط برتنے کا مشورہ دیا گیا ہے جب کہ موٹرسائیکل سواروں سے کہا گیا ہے کہ وہ غیر ضروری سفر سے گریز کریں۔
غیر ملکی خبر رساں ادارے کے مطابق دبئی اور متحدہ عرب امارات کی دیگر ریاستوں نے شدید بارش سے نمٹنے کیلئے پلان تشکیل دے دیا ہے، پلان کے تحت سرکاری دفاتر کو ورک فرام ہوم یعنی گھر سے کام کرنے کی ہدایت کی گئی ہے جب کہ تعلیمی اداروں میں تعطیل اور آن لائن کلاسز کی ہدایت کی گئی ہے۔
متحدہ عرب امارات اور مشرق وسطیٰ بدلتے موسمی حالات سے نمٹنے کیلئے مؤثر منصوبہ بندی سے مالی و جانی نقصان سے بچانے کی ہر ممکن کوشش کرتا دکھائی دیتا نظر آرہا ہے جس کے تحت دبئی کے ولی عہد اور دبئی کی ایگزیکٹو کونسل کے چیئرمین شیخ حمدان نے دبئی میں تمام سرکاری اداروں کو ہدایت کی ہے کہ وہ موسمی تبدیلیوں کی وجہ سے ڈیجیٹل ٹیکنالوجی سے استفادہ کرتے ہوئے اپنی ذمہ داریاں ادا کریں۔
اماراتی حکام نے نجی شعبے کو بھی ہدایت دی ہے کہ وہ ملازمین کے لیے ورک فرام ہوم کے انتظامات کریں اور موسم کے اتار چڑھاؤ کے دوران ان کی حفاظت کو یقینی بنائیں۔
دبئی کے ولی عہد شیخ حمدان کی ہدایت پر دبئی کے اسکولز نے آج ریموٹ لرننگ سیشن منعقد کرنے کے پیغامات والدین کو بھیج دیے ہیں، ایمرجنسی پولیس اور ٹرانسپورٹ حکام نے بھی عوامی تحفظ کو یقینی بنانے کے لیے پیشگی اقدامات کیے ہیں۔