بارہ مولہ گرینیڈ حملہ : مہلوک شخص کے رشتہ داروں نے راجوری پونچھ شاہراہ پر دھرنا دیا

جموں/۱۸مئی
شمالی ضلع بارہ مولہ کے دیوان باغ علاقے میں گرینیڈ حملے میں ہلاک ہوئے شہری کے لواحقین نے راجوری پونچھ شاہراہ پر دھرنا دیا۔
ضلع انتظامیہ اور پولیس کے سینئر عہدیدار جائے موقع پر پہنچے اور لواحقین کو یقین دلایا کہ گھر کے ایک فرد کو سرکاری نوکری کے ساتھ ساتھ چار لاکھ روپے بطور ایکس گریشا فراہم کیا جائے گا۔
یو این آئی اردو کے نامہ نگار نے بتایا کہ ضلع بارہ مولہ کے دیوان باغ علاقے میں گرینیڈ حملے میں ہلاک ہوئے رنجیت سنگھ ساکن باکرا راجوری کے رشتہ داروں نے بدھ کے روز راجوری پونچھ شاہراہ پر دھرنا دیا جس کے نتیجے میں اس شاہراہ پر گاڑیوں کی آمدورفت معطل ہو کر رہ گئی۔
مظاہرین مطالبہ کر رہے تھے کہ جاں بحق شخص کے گھر والوں کو ۲۵لاکھ روپے اور گھر کے ایک فرد کو سرکاری نوکری فراہم کی جائے ۔انہوں نے بتایا کہ رنجیت سنگھ گھر کا واحد کفیل تھا اور اُس نے اپنے پیچھے اہلیہ‘ چار بیٹیوں اور ایک کمسن لڑکے کو چھوڑا ہے لہذا اُس کے اہل خانہ کو بھر پور مالی مدد کی ضرورت ہے ۔
ذرائع نے بتایا کہ ضلع انتظامیہ اور پولیس کے سینئر آفیسران جائے موقع پر پہنچے اور مظاہرین کو یقین دلایا کہ گھر کے ایک فرد کو سرکاری نوکری کے ساتھ ساتھ چار لاکھ دئے جائیں گے ۔
معلوم ہوا ہے کہ پولیس کے آفیسران نے موقع پر ہی لواحقین کو ایک لاکھ روپیہ کی چیک فراہم کی ۔
بتادیں کہ بارہمولہ کے دیوان باغ علاقے میں منگل کی شام کو شراب کی دکان کے اندر ایک گرینیڈ داغا گیا جس کے نتیجے میں دکان میں موجود چار ملازمین زخمی ہوئے جن میں سے بعد میں ایک کی ہسپتال میں موت واقع ہوئی ۔