’یوم جمہوریہ کے پیش نظر سیکورٹی کے خاطر خواہ انتظامات کئے گئے ہیں‘

جموں//
ایڈیشنل ڈائریکٹر جنرل آف پولیس لا اینڈ آرڈر وجے کمار نے پیر کے روز کہاکہ یوم جمہوریہ کے پیش نظر سیکورٹی کے خاطر خواہ انتظامات کئے گئے ہیں۔
کمار نے کہاکہ تمام حساس مقامات پر خصوصی سیکورٹی بھی بڑھا دی گئی ہے تاکہ ملک دشمن عناصر کے منصوبوں کو ناکام بنایا جاسکے۔
ان باتوں کا اظہار اے ڈی جی پی نے جموں میں نامہ نگاروں سے بات چیت کے دوران کیا۔
اے ڈی جی پی نے کہاکہ جموںکشمیر میں سیکورٹی کے غیر معمولی انتظامات کئے گئے ہیں۔کمار کے مطابق یوم جمہوریہ کے پیش نظر حساس علاقوں میں سیکورٹی فورسز کی تعیناتی بڑھائی گئی ہے۔انہوں نے مزید بتایا کہ جموں وکشمیر کے سبھی اضلاع میں ناکوں کا جال بچھایا گیا ہے جہاں پر ہر آنے جانے والے کی باریک بینی سے تلاشی لی جارہی ہیں۔
کمار کے مطابق حساس علاقوں میں رات کی پیٹرولنگ بھی بڑھائی گئی جبکہ ایل او سی اور بین الاقوامی سرحد پر سیکورٹی فورسز کومستعد رہنے کے احکامات جاری کئے گئے۔
اے ڈی جی پی نے بتایا’’یوم جمہوریہ کی تقریبات کو خوش اسلوبی کے ساتھ پایہ تکمیل تک پہنچانے کی خاطر سیکورٹی ایجنسیوں کی کئی میٹنگیں ہوئی ہیں جس دوران امن و قانون کی صورتحال اور ملک دشمن عناصر کے منصوبوں کو ناکام بنانے کی خاطر حکمت عملی ترتیب دی گئی۔‘‘
ایڈیشنل ڈائریکٹر جنرل آف پولیس نے کہاکہ جموں وکشمیر کے سبھی اضلاع کے ساتھ ساتھ خصوصی توجہ راجوری اور پونچھ جیسے دہشت زدہ علاقوں پر دی جارہی ہیں۔انہوں نے بتایا کہ یوم جمہوریہ کے حوالے سے سیکورٹی کے تمام تر انتظامات کئے گئے ہیں اور کسی کوبھی امن و امان میں رخنہ ڈالنے کی اجازت نہیں دی جائے گی۔
کمار کے مطابق حساس علاقوں میں ملی ٹینٹ مخالف آپریشنز میں شدت لائی گئی ہے۔
بتادیں کہ یوم جمہوریہ کے پیش نظر جموں وکشمیر کے سبھی اضلاع میں سیکورٹی فورسز کو مستعد رہنے کے احکامات صادر کئے گئے ہیں۔