جموں//
بھارتیہ جنتا پارٹی(بی جے پی) کے جموںکشمیر یونٹ کے صدر رویندر رینہ کا کہنا ہے کہ عوام کی بڑے پیمانے پر حمایت سے بی جے پی جموں وکشمیر میں ہونے والے لوک سبھا انتخابات میں کلین سویپ کرے گی۔
رینا نے کہا کہ جموں کشمیر میں آج ہر طرف امن،خوشحالی اور بھائی چارے کا دور ہے ۔
بی جے پی صدر نے ان باتوں کا اظہار جمعہ کو یہاں ایک عوامی جلسے سے اپنے خطاب کے دوران کیا۔
رینا نے کہا’’جموںکشمیر میں پتھر بازی ہوتی تھی ہڑتال کے کلینڈر جاری ہوتے تھے ، گولیوں اور گرینیڈوں کا شور سنائی دیتا تھا وہ دور ختم ہوگیا لیکن آج یونین ٹریٹری میں ہر طرف امن، خوشحالی اور بھائی چارے کا دور ہے‘‘۔
ان کا کہنا تھا’’ہر طرف خوشحالی ہے امن ہے اسی لئے بچہ بچی کہتا ہے کہ پھر ایک بار مودی سرکار‘‘۔رینا نے کہا کہ عوام کی حمایت سے بی جے پی لوک سبھا انتخابات میں کلین سویپ کرے گی۔
نیشنل کانفرنس، پی ڈی پی اور کانگریس کو ہدف تنقید بناتے ہوئے مسٹر رینہ نے کہا’’ان پارٹیوں نے گجر بکروال طبقے ، او بی سی سے وابستہ لوگوں کا استحصال کیا‘‘۔انہوں نے کہا کہ ان پارٹیوں کو چاہئے کہ وہ لوگوں سے معافی مانگیں۔
رینا کا کہنا تھا’’بی جے پی کا یہاں کبھی وزیر اعلیٰ نہیں رہا ہے لیکن اب بی جے پی کا ہی وزیر اعلیٰ بنے گا۔‘‘