سرینگر//
صوبائی کمشنر کشمیر ‘وجے کمار بدھوری نے ہفتے کے روز کہا کہ انتظامیہ شہر خاص کی شان رفتہ کو بحال کرنے کے لئے وسیع پیمانے پر کام کر رہی ہے ۔
بدھوری نے کہا کہ حبہ کدل کا برج لوگوں کی تفریح کیلئے ایک اور جگہ بن جائے گا جہاں لوگ شام کو جمع ہو کر لطف اندوز ہوسکتے ہیں۔
صوبائی کمشنر نے ان باتوں کا اظہار ہفتے کو یہاں نامہ نگاروں کے ساتھ بات کرنے کے دوران کیا۔
بدھوری نے کہا’’جب ہم جی ٹونٹی اجلاس کے دوران سمارٹ سٹی کی تیاریاں کر رہے تھے تو کچھ لوگ کہتے تھے کہ شہر خاص کو نظر انداز کیا جا رہا ہے‘‘۔انہوں نے کہا’’انتظامیہ شہر خاص کی شان رفتہ کو بحال کرنے کیلئے سرعت سے کام کر رہی ہے ‘‘۔
صوبائی کمشنر نے کہا کہ سی ای او اطہر عامر خان کی قیادت میں سمارٹ سٹی پروجیکٹ کے تحت سری نگر میں اچھا کام انجام دیا گیا۔انہوں نے کہا کہ حبہ کدل کا پل لوگوں کی تفریح کے لئے ایک اور جگہ بن جائے گا جہاں لوگ شام کو جمع ہو کر لطف اندوز ہوسکتے ہیں۔ان کا کہنا تھا کہ سری نگر میں تمام پروجیکٹوں پر کام تیزی سے ہو رہے ہیں۔
بدھوری نے کہا کہ قمر واری کے سیمنٹ برج کو اگلے سیشن تک مکمل کیا جائے گا۔
جنگلات میں آتشزدگی کے بارے میں پوچھے جانے پر انہوں نے کہا کہ موسم خشک ہے جس سے ایسی واردات رونما ہوتی ہیں۔انہوں نے کہا کہ تین جگہوں سے ہمیں ایسی رپورٹس موصول ہوئی ہیں جن میں فوری کارروائی کی گئی ہے ۔