بارہمولہ:شادی کا جھانسہ دے کر رقم اینٹھ لینے والا جعلساز گرفتار

سرینگر//
شمالی ضلع بارہمولہ میں شادی کے نام پر رقومات اینٹھنے والے جعلساز کو پولیس نے دھر دبوچ کر سلاخوں کے پیچھے دھکیل دیا۔
پولیس کے ایک ترجمان نے بتایا کہ پولیس پوسٹ دلنہ میں مشتاق احمد بٹ ولد غلام محمد بٹ ساکن ہد پورہ کھائی ٹنگن نے تحریری طورپر شکایت درج کی کہ اس کے بھائی کی شادی کی تقریب کی تاریخ ۳۱دسمبر ۲۰۲۳کو طے پائی اور راجوری کے تھانہ منڈی علاقے سے دولہن لانی تھی۔
ترجمان نے مزید بتایا کہ دولہا دلہن کے گھر والے ایک دوسرے کو نہیں جانتے تھے اور وہ درمیانہ دار(مڈل مین) غلام رسول گاسی ولد علی محمد گاسی ساکن کاکہ پورہ پلوامہ کے ذریعے رابطے میں تھے ،مگر درمیانہ دار اب فون اٹھانے کی بھی زحمت گوارا نہیں کر رہا ہے ۔
تحریری شکایت موصول ہونے کے بعد پولیس نے معاملے کی نسبت کیس درج کرکے تحقیقات شروع کی۔
ترجمان نے بتایا کہ دلنہ پولیس ٹیم نے ٹیکنیکی صلاحیتوں کو بروئے کار لایا جس دوران انہوں نے جعلساز کو سرینگر میں ٹریس کیا۔
پولیس ترجمان نے بتایا کہ ابتدائی تحقیقات کے دوران منکشف ہوا کہ مذکورہ شخص نے شادی رچانے کے نام پر شکایت کنندہ کے خاندان کو دھوکہ دیا اور غیر قانونی طورپر ان سے۱۸ء۱لاکھ روپیہ کی رقم اینٹھ لی ۔
پولیس نے فوری کارروائی عمل میں لا کر جعلساز کو دھر دبوچ کر سلاخوں کے پیچھے دھکیل دیا۔اس سلسلے میں مزید تحقیقات جاری ہے ۔