پونچھ جھڑپ: تیسرے روز بھی حملہ آوروں کی تلاش کیلئے آپریشن جاری

جموں//
جموں وکشمیر کے ضلع پونچھ کے تھنہ منڈی بفلیاز کے جنگل علاقے جہاں جمعرات کی سہہ پہر ملی ٹنٹوں کے دو فوجی گاڑیوں پر حملہ میں۵فوجی جوان جاں بحق جبکہ دو زخمی ہوئے تھے ، میں ہفتے کو تیسرے روز بھی وسیع پیمانے پر تلاشی آپریشن جاری ہے ۔
سرکاری ذرائع نے بتایا کہ دہشت گردوں کی تلاش کے لئے علاقے میں وسیع پیمانے پر تلاشی آپریشن جاری ہے ۔
ذرائع نے کہا کہ وہاں چھپے دہشت گردوں کا سراغ لگانے کیلئے فضائی نگرانی کی جا رہی ہے اور سنیفر کتوں کو بھی کام پر لگایا گیا ہے ۔ان کا کہنا تھا کہ محاصرے کو سنگین تر کرنے کے لئے فوج کی اضافی کمک کو طلب کیا گیا ہے ۔
ادھر قومی تحقیقاتی ایجنسی (این آئی اے ) کی ایک ٹیم نے جمعہ کے روز جموں وکشمیر کے ضلع راجوری کے تھنہ منڈی بفلیاز کے جنگل علاقے میں جائے انکائونٹر کا دورہ کیا۔جموں وکشمیر پولیس کے سربراہ آر آر سوئن اور۱۶کور کمانڈر سندیپ جین نے جمعے کے روز پونچھ کے بفلیازمیں جاری آپریشن کا جائزہ لیا۔
جموں وکشمیر کے راجوری ضلع کے تھنہ منڈی بفلیاز علاقے میں ملی ٹینٹوں نے فورسز کی دو گاڑیوں پر گھات لگا کر حملہ کیا جس نتیجے میں۵فوجی جوان جاں بحق ہوئے جبکہ مزید تین کو تشویشناک حالت میں فوجی ہسپتال منتقل کیا گیا۔
جموں نشین دفاعی ترجمان نے بتایاکہ راجوری اور پونچھ کے جنگلی علاقوں میں۲۰دسمبر سے ملی ٹینٹ مخالف آپریشن جاری ہے ۔انہوں نے بتایا کہ جمعرات سہ پہر۳بجکر۴۵منٹ پر دہشت گردوں نے دو فوجی گاڑیوں پر اندھا دھند فائرنگ شروع کی جس کے نتیجے میں تین اہلکار موقع پر ہی جاں بحق ہوئے جبکہ مزید تین فورسز اہلکاروں کو علاج ومعالجہ کی خاطر ہسپتال منتقل کیا گیا۔
بعض ذرائع کے مطابق حکام نے راجوری اور پونچھ میں بنا بت احتیاط انٹرنیٹ خدمات کو معطل کر دیا ہے ۔