جنوبی ضلع اسلام آبادکے ڈورو علاقے میں مسلح تصادم کا آغاز

سرینگر/۱۰مئی
جنوبی کشمیر کے ضلع اسلام آباد کے ڈورو علاقے میں منگل کی سہ پہر کو سیکورٹی فورسز اور جنگجووں کے مابین گولیوں کا تبادلہ ہوا ہے ۔
پولیس کے ایک ترجمان نے بتایا کہ۹۱آر آر اور جموں وکشمیر پولیس نے مصدقہ اطلاع موصول ہونے کے بعد ڈورو اسلام آبادعلاقے کو محاصرے میں لے کر جنگجو مخالف آپریشن شروع کیا۔
ترجمان نے بتایا کہ سیکورٹی فورسز کے اہلکار تلاشی کارروائی میں مصروف تھے کہ اسی اثنا میں علاقے میں موجود جنگجووں نے فورسز پر اندھا دھند فائرنگ شروع کی۔
پولیس نے کہاکہ حفاظتی عملے نے بھی پوزیشن سنبھال کر جوابی کارروائی کا آغاز کیا جس دوران طرفین کے مابین جھڑپ شروع ہوئی۔
ذرائع نے بتایا کہ سیکورٹی فورسز کو اطلاع موصول ہوئی ہے کہ علاقے میں دو سے تین ملی ٹینٹ پھنس کر رہ گئے ہیں۔
دریں اثنا سیکورٹی فورسز اور پولیس کی اضافی کمک نے ڈورو اور اُس کے ملحقہ علاقوں کو سیل کرکے لوگوں کے چلنے پھرنے پر پابندی عائد کی۔
اس سلسلے میں مزید تفصیلات کا انتظار ہے ۔